صابرين النجيلي لـ"وشوشة": "موافقة نتجوز" أغنية من القلب ونجاحها يفرح
عبرت المطربة صابرين النجيلي عن سعادتها الكبيرة بردود الأفعال التي تلقتها على أحدث أغانيها “موافقة نتجوز”، مؤكدة أنها واحدة من أقرب الأعمال لقلبها، وقالت:"الحمد لله الأغنية من الأغاني اللي بحبها جدًا، ورغم كل الظروف الصعبة اللي بيمر بيها العالم حاليًا، من حروب ومشاكل سياسية، الحمد لله الأغنية حققت صدى حلو، ولسه في المرحلة الجاية إن شاء الله لما الأوضاع تهدأ، هتاخد وضع أكبر بكتير، لأنها فعلا مناسبة جدًا للأفراح والعرايس".
وأوضحت صابرين النجيلي في تصريح خاص لـ”وشوشة” كواليس تنفيذ الأغنية، قائلة: “الأغنية من كلماتي وألحاني، ولما خلصتها حسيت إنها مناسبة أوي يتسمع صوتي فيها، خصوصًا إنها من نوع الأغاني اللي الناس كتير طلبوها مني، أغاني رومانسية تنفع للفرح وتوصل مشاعر الحب ببساطة”.
وتابعت: "اخترت أنفذها مع الموزع يوسف حسين، لأن أغلب شغلي معاه ومرتاحين مع بعض جدًا، وكمان اشتغلنا مع مهندس الصوت ماهر صلاح، والمخرج أحمد علاء الجندي، وقررنا نعمل الكليب بشكل بسيط، كما تحض عروسة نفسها للفرح وفعلا طلع شكله حلو أوي".
وأضافت: “الأغنية مش قصة شخصية، لكن طلبت مني كثيرا، لدرجة إن أختي قالت لي كان نفسي تعمليلي أغنية مخصوص لفرحي، صحيح عملتها بعد فرحها، بس عجبتها جدًا، وكمان الناس اللي كانوا طالبين مني النوع دة من الأغاني انبسطوا جدًا بيها".
وأعربت صابرين عن سعادتها بتصدرها قائمة الأغاني الرائجة على تيك توك"، قائلة: "أغنيتي "موافقة نتجوز"، "وأنت مين"، و"قلبي دق دقة" موجودين في قوائم الأغاني الرائدة، ودة فضل كبير من ربنا، خصوصًا إن الإنتاج كله ذاتي، بدون تدخل شركات.
وأردفت: "بشتغل على كل تفصيلة بنفسي، من كلمات وألحان وتنفيذ، وكمان مع إخواتي بنبتكر أفكار للتسويق زي صفاء اللي دايمًا بتشاركني".
وعن طريقة اختيارها للمواضيع، قالت: "مش بحدد موضوع بعينه، بس بكتب وألحن كتير، ولما بلاقي فكرة مناسبة للوقت أو حاسة إنها هتعجب الناس بنفذها بحب أغني أفكار جديدة، وتكون مختلفة ومافيش حد قالها قبل كدة".
واختتمت صابرين حديثها قائلة: "بحب جمهوري جدًا، عندي انتماء كبير ليهم، وبشكرهم من قلبي على دعمهم الدائم، ووعد مني إنكم هتسمعوا مني كل الألوان اللي بتحبوها وبالنسبة للجديد، إحنا فعلا بنحضر لأكتر من أغنية، بعضها من كلماتي وألحاني، وبسمع حاجات من ملحنين تانين، ولسه بقرر إيه اللي هينزل، شكرا لـ"وشوشة"".