كنتي هرم يا أمي.. خالد جلال ينعي سميحة أيوب بهذه الرسالة
نعى المخرج خالد جلال وفاة الفنانة سميحة أيوب التي رحلت عن عالمنا أمس من خلال منشورا مؤثرا عبر حسابه الشخصي على موقع "فيسبوك".
كتب خالد جلال: "وهي يعني أم كلثوم ماتت؟ أمي حبيبتي بعد التحية والسلام لأول مرة ملاقيش كلمات تعبر عن مشاعر الفقد اللي حسيت بيها النهارده.. جايز علشان صعب أصدق بعد طول الوقت معاكي أن البطلة مش هتظهر مرة تانية وجايز لأن الحياة الحقيقية مش زي الفيلم اللي ممكن نشوفه كل يوم و البطلة تظهر في نفس الثانية ونستمتع بإبداعها".
أضاف: "آخر مرة تمثيل كانت ف عيد الشرطة اللي قبل اللي فات وكنتي تعبانة قبلها وأصريت إنك تيجي ووافقتي وكنتي زي البدر على الشاشة وعلى المسرح وجه الحصاد الرئيس كلمك وكلمتيه وطلع على المسرح وحياكي وقبل جبينك، من تسع سنين كنا في المغرب وسمعتك بتتكلمي مع القديرة الراحلة ثريا جبران، و قلت لك الكلام ده لازم نحتفظ بيه ده ميراث وقلتي تعالى نعمل كده وعملنا سميحة أيوب تروي لخالد جلال سنة 2016 وسام عظيم بفخر بيه لحد النهارده إنك بتحكيلي أنا والناس بتسمع حكاياتك".
واستطرد: "في كل رحلة وكل مكان كنتي موجودة وجودك سند وحماية وأمان وحنان وحب وطيبة وقوة كل كلمة كنتي بتقوليها خبرة عمر ودرس عميق حتى وانتي بتهزري فكرتك أول مرة شفتيني سنة 1996 في روما مع العظيم الراحل سعد الدين وهبة وكنتوا راجعين من ألمانيا وزرتونا في الأكاديمية المصرية بروما ودخلتي بروفة مسرحيتي وسمعتيني وأنا بخرج وقولتي لازم نشوفك لما ترجع مصر وأرجع بسرعة ولما طلبت صوتك يحكي حكاية دفعة بعد الليل في حفل تخرجهم و حكيتي فبقت حفلتهم بقيمة الصوت والضوء من جمال صوتك".
وتابع خالد جلال: "لما طلبت منك تظهري على شاشة افتتاح مهرجان المسرح العربي بالقاهرة وقولتي لضيوف مصر من كل الوطن العربي (أهلا بيكم في مصر مهد المسرح العربي) إيه ده يا امي هرم بيتكلم؟
وأضاف: “فاكرة الرئيس حافظ الأسد لما سماكي سيدة المسرح العربي؟ طب فاكرة الرئيس أنور السادات وهو بيقول للرئيس جيسكار ديستان مدام سميحة توچووور كومبليه طب فاكرة وقفتك مع الست أمينة رزق في فرنسا وانتوا بتعملوا فيدرا طب فاكرة وانتي ماسكة المسرح الحديث لما ابتدت حرب أكتوبر و خليتي العبقري محمد نوح وكل الفرقة يعملوا مدد مدد شدي حيلك يا بلد طيب فاكرة التمثال اللي عملهولك عصام درويش كنتي فرحانة بيه قد إيه؟”
واختتم حديثه: "أمي الحبيبة كلامي ملخبط مش كده؟، معلش ما هو ألف حكاية وحكاية معاكي برضه مش سهل ترتيبها في كلمتين هنا، كنت دايما في لحظات الوداع اللي زي دي بكتب بالفصحي وأقول (الحزن عميق) ولأول مرة اكتشف إني ممكن أحزن أكتر من الجملة دي ودايما كنت أقول للي رحل أدعيلنا بس معاكي بقولك اتطمني أنا هفضل ادعيلك ليل ونهار متخافيش وأخيرا اللي زيك يفضل عايش في القلوب والأرواح ومرفرف حوالينا على طول وأخيرا يا سوسو الجميلة هزعل ليه؟ وهي يعني أم كلثوم ماتت؟ ماهي عايشة لحد النهارده تصبحي علي خير، بحبك ابنك خالد جلال".