ياسمينا العبد: تجربة "موضوع عائلي" خطيرة.. والعمل مع أحمد الجندي كان حلمًا
وصفت الفنانة الشابة ياسمينا العبد مشاركتها في مسلسل "موضوع عائلي" بأنها من التجارب المميزة في مسيرتها الفنية حتى الآن، مشيدة بأجواء التعاون داخل فريق العمل.
وقالت ياسمينا خلال حديثها في برنامج "الراديو بيضحك" المذاع على راديو 90.90: "التجربة كانت خطيرة وممتعة، وقد إيه هما فريق جميل ومفيش حاجة اسمها نفسنة ما بينهم، كله بيساعد بعض وبيحب بعض".
وأضافت ياسمينا أن حلمها بالعمل مع المخرج أحمد الجندي تحقق من خلال هذا المشروع، مشيرة إلى أنها تعتبره شخصية مهمة ومُلهمة في الوسط الفني.
وتابعت: "كان حلم كبير إني أشتغل مع أستاذ أحمد الجندي، لأنه بالنسبالي حاجة كبيرة جدًا. قعدني معاه وحكى لي ذكريات من فيلم طير إنت، والموضوع حصل بسرعة. قابلت أستاذ أحمد الجندي، عملت تجربة أداء، وبعدها سافرت يومين، وطلبوا مني أصوّر مشهدين كمان وبعتهم، وبعدين جالي الدور الحمد لله".
وعن استعدادها للدور، أوضحت أنها عملت على تقديم شخصية "شيماء" بشكل بعيد عن الصورة النمطية، وقالت: "ذاكرت كويس جدًا ومكنتش عايزة شخصية شيماء تظهر بالشكل التقليدي، كنت عايزة كل حاجة تمشي بسلاسة ومن غير ما ندخل في تفاصيل ملهاش لازمة".
كما أعربت عن تقديرها الكبير للفنان ماجد الكدواني، واصفة إياه بأنه من أفضل الأشخاص الذين عملت معهم، وقالت: "ماجد التاني من أفضل الناس اللي اشتغلت معاهم، لأنه إنسان كويس وبيبقى عاوز يكبر اللي بيشتغل معاه. بعد المسلسل بارك لي، وأنا مكنتش مستوعبة ولا مصدقة".