"هتسيبيني وتمشي خلاص".. أحمد زاهر يوجه رسالة مؤثرة لابنته بعد زواجها!
وجه الفنان أحمد زاهر رسالة مؤثرة إلى ابنته ليلى عقب زواجها من الفنان هشام جمال، في حفل زفاف أقيم قبل يومين بمنطقة الأهرامات، وسط حضور واسع لنجوم الفن والمجتمع.
وشارك أحمد زاهر جمهوره عبر حسابه الرسمي على موقع “إنستجرام” مقطع فيديو من لحظات الحفل، ظهر فيه وهو يرقص مع ابنته ليلى على أنغام أغنية “بنت أبويا” بصوت الفنانة هنا يسري، في مشهد مؤثر غلفه الحنين والعاطفة، عبر من خلاله عن حبه العميق ومشاعره الصادقة تجاه ابنته في يوم زفافها.
وعلق على الفيديو قائلاً:" وأنا داخل ارقص معاكي شفت وشك اللي زي القمر أجمل عروسة في الدنيا كلها بصيت في عينيكي وفجأه مر قدامي شريط ذكريات من أول لما جيتي الدنيا وأنا أول واحد شيلتك بين إيديا وشفت كل لحظة وانتي بتكبري قدام عنيا لحد اللحظه اللي احنا بنرقص فيها مع بعض وانتي عروسه زي القمر".
وأضاف : "وخلاص هاتسيبيني وتمشي مع عريسك حسيت بمشاعر كتير متناقضه ومختلفه والدموع نزلت من عيني غصب عني وحسيت إني عاوز أقولك لا متمشيش وتسيبيني وأرجع في كلامي بس في نفس الوقت أنا عارف أن دي أجمل لحظه في حياتك إنك اخترتي اللي بتحبيه وبيحبك".
وتابع :"بصراحه اخترتي صح راجل ومحترم وبيحبك وبيقدرك وهايشيلك جوه عنيه زي ما وعدني مبروك يا بنت عمري يا بنت قلبي بحبك يا اجمل بنوته واجمل عروسه في الدنيا كلها بحبك يا ليلي".