إيمان السيد عن دورها في "وتقابل حبيب": فهمت الدرس وتعلمت منه
حرصت الفنانة إيمان السيد على الرد بوضوح على الانتقادات التي طالت دورها في مسلسل "وتقابل حبيب".
وشاركت إيمان السيد جمهورها منشور مطول ترد فيه على هذه الانتقادات وذلك عبر حسابها الرسمي على "إنستجرام"، قائلة: "أنا فاهمة ومدركة جدًا إن دوري في العمل نفسه مش عاجبك كمشاهد ودا حقك جدًا، وأنا شخصيًا ببقى عارفة ومدركة لما بعمل دور مش حساه، وببقى متفهمة طالما إنك تبدي رأيك بموضوعية واحترام، وعارفة كويس إن ممكن أي حاجة كويسة عملتها قبل كده تتنسي في ثانية في وسط هجوم بسبب دور لم ينل استحسانك ودي حاجة تعلمتها مع الوقت، إني أتوقع أي شيء".
وأضافت: “أنا شخصيًا اتعلمت في حياتي ألا ألقي بأخطائي على شماعة الغير لأني لو عملت كدة مش هتقدم خطوة في حياتي، وأنا كبيرة كفاية إني أتحمل دايما نتيجة اختياراتي، وأكيد بتضايق شوية لأني طول عمري باحفر في الصخر عشان أتقدم خطوة أو على الأقل أثبت مكاني، ولكن مع الخبرة في الحياة وفي شغلي اتعلمت أتجاوز المواقف وأفكر في اللي جاي ومتفائلة، ودايمًا ظني خير في ربنا سبحانه وتعالى".
وتابعت حديثها عن انتقادات الجمهور: “وكنت دايمًا لما حد يعرض عليا دور صغير بقول أنا ممكن أعمل دا مع ياسمين فقط، لأن الناس عارفة رصيدنا مع بعض، وعمري ما قرأت قبل كدة تعليق يفرضني على العمل غير المرة دي، وعمري ما قرأت قبل كدة تعليق بيقول إن حد بيفرضني على العمل غير المرة دي، ولا قرأت كلام مؤذي زي المرة دي، لدرجة إن زميلة ليا في العمل كلما أبدت رأيها في شئ على السوشيال ميديا الاقي نفسي بتهاجم في الكومنتات حتى لو كان البوست بتاعها ليس له علاقة بالعمل نفسه، وأنا قبل ما ابتدي تصوير كلمت أستاذ عمرو مؤلف العمل واللي بحترمه جدا وكنت بعتذر عن الدور، وبعترف إني عملت دا في توقيت سيء".
وختمت منشورها قائلة: “ومكنش ينفع وهو شخصيا قالي مش هينفع تعملي كدة مع ياسمين وقلت له أنا ممكن أجيلها مشهد واحد في مسلسل بس أكون حاسة المشهد وفي النهاية أشتغلت لأن توقيتي زي ما قلت كان غلط، وأنا سعيدة بنجاح العمل ومبسوطة بياسمين وفرحانة علشانها لأنها تستاهل كل خير، وفي النهاية، "I got my lesson".
والمسلسل من بطولة ياسمين عبد العزيز ونيكول سابا وخالد سليم وكريم فهمي وأنوشكا وصلاح عبد الله ومحمود ياسين وإنجي كيوان ومن تأليف عمرو محمود ياسين ومن إخراج محمد الخبيري.
مواعيد عرض مسلسل “وتقابل حبيب”
يعرض على قناة "DMC" الساعة 8:30 مساءً، مع إعادة أولى 2:45 صباحًا، وإعادة ثانية 1:30 ظهرًا.
ويعرض على قناة "DMC" دراما الساعة 6:00 مساءً، مع إعادة أولى 4:30 صباحًا، وإعادة ثانية 9:30 صباحًا.