سخر منه.. زوجة رامي صبري تهاجم ويجز: أنت مش على الخريطة وواحد فاضي
ردت شيرين عادل، زوجة المطرب رامي صبري، على الهجوم الذي شنّه مطرب الراب ويجز على زوجها، وذلك بسبب حديثه عنه في أحد البرامج التلفزيونية.
ونشرت شيرين جزءً من حديث رامي عبر حسابها على إنستجرام بخاصية القصص المصورة وعلقت: ده جزء من الحلقة اللى رامي اتكلم فيها عن الراب.. ومن هنا ورايح مش هسكت وهرد على أي حد يفكر يتكلم عنه تاني بأي طريقة مش عجباني.
واضافت: أولاً رامي اتسال سؤال في برنامج ورد وعنده كل الصلاحية لأى رد أو إجابة على أي سؤال يعني مفيش اي مانع يخلي رامي لما يتسأل سؤال ميجاوبش وثانيا رامي صبري ده يا حضرت فنان من أهم الفنانين في الوطن العربي ومن أهم الأصوات ده لو حضرتك مش معانا في مجال المزيكا وبعدين والله يا ريت رامي عنده الوقت بتاع حضرتك الفاضي أوى بتاع 5 شهور فاضي يا ريت كنا نتمنى.
وتابعت: أما بقى موضوع رامي رقم كام ده هو الحقيقة مش شاغل باله أوي بس لو حضرتك شايف إن رامي رقم 19 مع الأسف الشديد لازم أقول لحضرتك تبقى أنت مش موجود على الخريطة من الأساس أغنية واحدة من رامي صبرى واحدة بس تعمل تاريخ لناس.
واستكملت: محتاج تذاكر كويس وتعرف انت بتتكلم عن مين قبل ما تتكلم لأنك واضح إنك عندك شغل تانى غير المزيكا لأنك لو جوة الشغلانة كنت مش هتقول ولا كلمة من الكلام دة علشان الناس متضحكش عليك لأنك اتكلمت عن فنان بجد مش جاى يهزر.
واختتمت شيرين عادل حديثها قائلة: وأخيراً لما تحب تعمل دعاية لأغنيتك الجديدة ابعد عن اسم رامي صبرى أنا عارفة إن اسمه ممكن يخلي الأغنية ترند بس حاول الأغنية بتاعتك الجديدة تعتمد فيها على نفسك.
