أحمد جمال سعيد: مشهدي المؤثر في "وتر حساس" كان متعب وصعب وثقيل
استضاف يوسف التهامي وفانا إمام في حلقة اليوم الخميس من برنامج "عيش صباحك" على "نجوم إف.إم"، الفنان أحمد جمال سعيد للحديث عن أعماله الفنية وأحدثها مسلسل "وتر حساس" الذي يتم عرضه حاليًا.
وبدأ الفنان أحمد جمال سعيد بالحديث عن التحضيرات الخاصة بدور "مازن" في مسلسل "وتر حساس" وقال: "أنا كنت 74 كيلو واتمرنت شوية حلوين لحد دلوقت بتمرن، واتمرنت كمان MMA فالموضوع ما كانش سهل أوي لكنه كان ممتع، وعملت أوديشن للدور كذا يوم مع المخرج وائل فرج والدور كان بالنسبة لنا فيه تحدي أوي وفيه مشاعر مش مفهومة والشخصية مش متوازنة".
وتابع: "مازن نفسه كشخصية بحبه لأنه فيه كل حاجة هو طيب لكنه شديد، وهو مكسور من باباه لكن واقف على رجله ما بيخافش من حد لكن بيخاف من تصرفاته، بيحب أسرته لكن محدش يتحداه فكل حاجة وعكسها جواه".
وأكد على التحدي الذي واجهه في هذا الدور، موضحًا: "كان عليا حمل وتحدي لأني ما كنتش متشاف في شخصية مازن فكان تحدي بالنسبة لي إني أعمل الدور ده وأوصل بيه لحتة معينة".
وحكى أحمد جمال سعيد عن كواليس تصوير المشهد الذي شهد رواجًا على مواقع التواصل الاجتماعي من المسلسل بعد عرضه ضمن أحداث الحلقة 18، والذي ظهر فيه أحمد جمال سعيد في شخصية "مازن" وهو يسمع رسالة صوتية من "فرح" التي تجسدها الفنانة تقى حسام، بعد معرفته بانتحارها، وقال: "مشهد متعب أوي وصعب وتقيل، وفعلا عجبني الكلام اللي اتكتب عالسوشيال ميديا وأن الناس حست باللي كنت عاوز أقوله، وكلمة حسبي الله ونعم الوكيل لما تيجي من حد فعلا مظلوم بتتهز، وإحساسها صعب".
وأضاف: "كان فيه خنقة جواه وهو كان مش عارف يعمل إيه وكمان مش عارف ينهار، والمشهد كان تقيل، لدرجة صعبت على المشاهدين لكن كانوا عاوزين يعرفوا هيحصل إيه بعد كده".
وأكد الفنان أحمد جمال سعيد أن المخرج ومدير التصوير وفريق العمل ساعدوه على تقديم هذا الأداء، موضحًا: "لما يبقى معاك كرو شاطر بتفرق، من أول المخرج الجامد وائل فرج وهو قاعد ورا الشاشة أنا متطمن، وهو بيفهم تمثيل ودي حاجة ممتعة لأنه هيوقفك لو سرحت قدام الكاميرا، فكان بيفرق معايا وسط مشاهد صعبة كان ده مشهد منهم، ومعانا مدير تصوير كريم أشرف عامل حالة، وكل اللي ورا الكاميرا بيحترموا اللحظة والمشهد".
وقال أن مسلسل "وتر حساس" سيكون علامة فارقة في مشواره، موضحًا: "بالنسبة لي نقطة هتفرق معايا جدا الفترة الجاية، وأنا أي حاجة بالنسبة لي بتبقى نقطة فارقة معايا، ووتر حساس حاجة هتفضل طول عمرها معلمة معايا مش هنساها لكن أنا كل دور بعمله بيبقى كده، والدور الجاي لازم يكون له شكل معين وأحترم الفرصة ولما آجي أعمل حاجة بعد كده تبقى أد المسئولية دي، وأنا بختار أعمالي ولو حاجة مش عاوزها مش هعملها، وأنا حاطط لنفسي معايير معينة".
وأوضح أنه يتوقع خلال التصوير أن تكون بعض المشاهد فارقة مع الجمهور لكنه لم يتوقع رد الفعل على مشهد مازن المؤثر، موضحًا أنه ما زال هناك مشهدين ضمن أحداث العمل سيكونوا "تريند" وليس شرطًا أن يكونوا لهم علاقة بدوره.