محمد شاهين لـ "وشوشة": سمعت "رصيد الستر" بالصدفة ومكنتش متوقع نجاحها

تحدث المطرب محمد شاهين عن أغنية "رصيد الستر" مشيرًا أنه لم يتوقع نجاحها كما أنه قام بسماعها بالصدفة.

وقال في تصريح خاص لـ "وشوشة": "محتاجين نركز في حوار الستر في حياتنا، لأن ربنا مبيشلش ستره عن حد، وجملة رصيد الستر خلص جملة تقيلة، ولما أنا سمعت الأغنية في الأول فكانت أغنية رصيد الستر عندك خلص دي تقيلة شوية، وأنا متوقعتش نجاح أي غنوة ليا، النجاح بيد ربنا سبحانه وتعالى والناس بتسمع وتقيم".

وكشف كواليس رصيد الستر قائلًا : “أنا لما جيت أسمعها سمعتها من الملحن والموزع إسلام مونتي بالصدفة هو كلمني في يوم وقالي عاوز اسمعهالك وأنا مكنتش في المود خالص إني أسمع شغل، بس لما سمعت الكلام بتاعها شدني يليها اللحن والتوزيعة قولت ليه لأ، فقالي تعالى نجرب وحطيت صوتي على الأغنية وبعدها شلتها من دماغي خالص لحد ما هو كلمني تاني وقالي الأغنية خلاص هتنزل قريب ولما نزلت مكنتش متوقع نجاحها بالعكس، في يوم وليلة سبحان الله لقيت الأغنية على “التيك توك” عاملة نجاح كويس وداخله على 50 مليون مشاهدة "باليوتيوب” الحمد لله نجاحها أبهرني".

وبسؤاله عن معايير أختيار أغانيه قال: "دلوقتي إحنا أكتر حاجة بنركز فيها هى الكلمات، بنختار الكلام بعناية جدًا، وبنحاول بقدر الأمكان نكون بعدين عن الاتجاه المنحدر في الفترات الأخيرة بالنسبة للكلام اللي بيكون فيه إسفاف وحاجة لا تليق بالحمهور العربي والمصري فبركز أكتر على الكلام الحلو والكلمة المفيدة اللي بتليق بمجتمعنا".

جدير بالذكر أن آخر أعمال محمد شاهين أغنية "الحب بسعر المصنع" وهى من كلمات أحمد شكري، ألحان وليد سامي، توزيع شندي وخليل، ومن كلماتها : "الحب بسعر المصنع 
قلبي اللى كان سجادة لمتها والحتة الغلبانة رمتها عشرتكوا وحبكوا فترة عقوبة وقضيتها
رخاص رخاص رخاص أعاتب ليه في ناس رخاص هذيع واخلى كله يعرف والعرض عام مش عرض خاص".