حوده بندق لـ "وشوشة": عملنا "روقان" في ساعتين ومتوقعتش نجاحها بنسبة 10%

أعرب المطرب حودة بندق، عن سعادته بردود الافعال التي شاهدها حول أغنيته "روقان"، قائلاً: "مكنتش متوقع كل النجاح للأغنية، واتصدمت بالأرقام اللي حققتها".
 

وقال "حودة" في تصريح خاص لـ "وشوشة": "روقان محدش فينا كان عامل حسابها خالص، يعني الحمد لله ربنا أكرمنا فيها ورضانا أخر رضا بس مكنتش أتخيل أن ده يحصل بنسبة 10% مثلا ف ده توفيق من ربنا ".


واستكمل حودة بندق حديثه عن كواليس الأغنية، معلقًا :"الأغنية كانت في مسلسل رحيل للفنانة ياسمين صبري، وتقريبًا هو مصطفى العزولي أخويا وحبيبي هو المنتج المنفذ المسلسل كلمني وقالي يا حودة أحنا في غنوة في المسلسل وعاوزك تبعتلي حاجة نسمعها وكده فسمعته غنوة قالي لا مش هى دي، فقولتله ده أنا معايا غنوة بس أروح عند الموزع أجبها بس ومكنتش لسه عملت روقان فروحت عند الموزع في ساعتين أنا والشاعر أحمد الجوكر وعملنا "روقان" دي في ساعتين وبعتناها لمصطفى قالي بس هى دي والمخرج تمام، ف أغنية روقان اتعملت في وقت صغير جدًا بس علشان اجتهادنا وروحت ومكسلتش لأن كان ممكن أكسل وأقول منا بعتلهم غنوة حلوة وموفقوش عليها لكن كلنا اجتهدنا وربنا يكرمنا".

وبسؤاله عن فكرة تصويرها في فيديو كليب قال : "لا مش ممكن لأنها معمولة بفيديو كليب للمسلسل فمعتقدش ممكن نعمل كده".


جدير بالذكر أن أغنية "روقان" لـ حودة بندق تخطت الـ 60 مليون مشاهدة، وهى من كلمات أحمد يوسف وألحان حودة بندق ورامي المصري وتوزيع وماستر رامي المصري.