"مش عاوز أموت مفضوح".. خالد الصاوي يكشف تفاصيل تعاطيه للمخدرات

تحدث الفنان خالد الصاوي، عن أصعب فترة في حياته بسبب تعاطي المخدرات والممنوعات، وأكد أنه تعرض لوعكة صحية شديدة بسبب إدمانه.

وقال خالد الصاوي خلال تصريحات تلفزيونية: "أنا عملت غلط في حياتي ممكن أخبيه واسكت، ولكن أنا بنقله لحد تاني يمكن أساعده ميقعش فيه.. الإنسان فيه شوية غرور، والحمد لله كانت صحتي كويسة طول عمري فساعات كنت أخش بالدراع واتماديت في الغلط".

وأضاف: "حصل موقف غريب.. فجأة قلبي لقيته بينط خارج صدري بطريقة بتقول لي هتموت حالا، ومشكلتي الكبيرة ساعتها  إني مش عايز أموت ويبقى فيه فضيحة".

وتابع: "وعايز أقوم أجمع البلاوي وأموت على نضافة، لأنها هتبقى فضيحة.. وأنا اسمي أحيانا بيبقى أهم من جسمي، فدخلت بالعافية على السرير.. 4 ساعات في السرير قلبي مش بيهدأ ومش عارف أعمل حاجة".

وأردف: "قلت لنفسي مش هنزل مستشفيات ومش هكلم حد، ولا هشوف حد ينقذني في الفضيحة اللي أنا فيها إلى أن لجأت لربنا وقلت لربنا: سبحانك معنديش غير إني ألجأ لك أرجوك انقذني من الموقف ده، وأنا هغير حياتي ومش هحط نفسي في الوضع المهين ده تاني، وعلى الأقل ومن باب الاحتياط خدني وبلاش الفضيحة اللي برة دي، لإن أمي مش هتستحمل".

وواصل: بعد دقيقة غفوت 4 دقائق بالظبط مكملتش 5 دقايق، وقمت كإني نايم 8 ساعات ومفيش مشكلة في القلب، وشيلت الممنوعات اللي هي كحول ومخدرات، وكل شئ ممكن أي حد يتخيله ولميتها وحرقت اللي حرقته، ورميت اللي رميته وكإني بعمل طقس نضافة، وصليت ونمت شوية صغيرين، وقمت لعبت رياضة ومجيتش جنب الحاجات اللي بتفكرني بالممنوعات لفترة، والقعدة نفسها والتليفونات والناس، لغاية لما لقيت نفسي أتعافى ودي النعمة".

واختتم: "المنيو بتاعي في الممنوعات كان متسع وده أسوأ وضع عيشته في حياتي، وكان عندي ظروف شخصية وعائلية ومهنية صعبة، والحقيقة أنا كنت السبب الأخطر فيها".