رئيس مجلس الإدارة
محمود إسماعيل
رئيس التحرير
عمرو صحصاح
رئيس مجلس الإدارة
محمود إسماعيل
وشوشة
رئيس التحرير
عمرو صحصاح

رشدى أباظة رفض يطلقنى.. صباح ترد بعد وصف علاقتهم بـ"النزوة"‎

رشدي أباظة و صباح
رشدي أباظة و صباح

ظهرت منيرة أباظة، شقيقة الفنان الراحل رشدي أباظة، في الاحتفال بمئوية سامية جمال بمهرجان جمعية الفيلم وفجرت مفاجأة حول شقيقها بشأن زواجه من صباح لمدة 24 ساعة.

 

وأكدت منيرة أباظة أن شقيقها الفنان الراحل رشدي أباظة اعترف لها بأن زواجه من صباح مجرد نزوة، وأكملت حديثها قائلة: "رشدي لما اتجوز صباح كان بيصور معاها فيلم، وتفاجئنا في يوم بمكالمة من رشدي بيكلم جوز أختي بيقوله أنا جاي دلوقتي حضرلي مأذون، وكنا كلنا متفاجئين أنه هيتجوز صباح وبنقول طب وطنط سامية جمال؟ ومكناش قادرين نتكلم، والخبر كان وصل القاهرة قبل ما يكتبوا الكتاب".

وتابعت: "سامية كلمت بابا في التليفون وقالتله اللي حصل، وقالها تعالي لما نعرف اللي حصل، وفعلًا كتب كتابه على صباح ورجعوا على بيروت، وسامية عرفت أول واحدة، وتاني يوم الصبح رشدي كلمنا في التليفون وقال إنه ساب صباح".

واختتمت شقيقة رشدي أباظة، قائلة: "رشدي كان بيعمل حساب وبيخاف من بابا جدًا، ولما رجع أتأسف وقاله دي كانت نزوة وحياته رجعت تاني مع سامية".


وردا على هذا الأمر حكت صباح أثناء حلولها ببرنامج ساعة صفا مع الفنانة والإعلامية صفاء أبو السعود عبر قناة ART، وقالت صباح: "مين ميبحبش رشدي أباظة؟! رشدي كان في لبنان بيعمل فيلم (إيدك عن مراتي) 1968، وفي الفيلم ده كنت هلبس فستان عروسة ونتجوز وكده، وخدناها جد أنا وهو، وأنا اتبسطت لأني رشدي جميل".
 

أضافت: "رشدي كان عنده أخت هنا في صيدا متجوزة، وروحنا اتجوزنا عندها، وهو كان جميل ولايقلي أوي، الموضوع بدأ لما كنا سهرانين بنتعشى وبعدين قالي عايز أتجوزك إيه رأيك، قولتله يلا معنديش مانع، واتجوزنا".

 

تابعت: "الصحافة كتبت أن صباح اتجوزت رشدي وخطفته من سامية جمال، وأنا خوفت أوي، وكان عندي حفلات في المغرب وسافرت وهو فضل في لبنان، وأختي قالتلي الدنيا قايمة عليكي، خوفت على اسمي وقولت للمحامي أرجوك عايزة أتطلق، رشدي قال لا يمكن، وأنا أصريت خوفا على فني واسمي والسبب الأساسي في الطلاق إن هو بيحب يشرب وأنا لأ، كأس على الماشي معلش، لكن متزودهاش، وكان لو روحنا سهرة وحد قالي إزيك يقلب الترابيزة ويقوم الدنيا كلها، كان غيور وكنت بحبه لكن حسيت إن حياتي مش طبيعية".

 

استكملت: "قولتله أنا مبحبش المشاكل، وأنا ست قوية مش زي كل الستات اللي بيموتوا فيه، وبعدين كنا في العربية بوصله مشوار قالي "أنا ربنا عارفة يعني إيه؟"، أستغفر الله العظيم، قولتله "أقف هنا ونزلني لا يمكن أركب معاك مهما حصل"، نزلت في السكة وأخدت تاكسي وهو كمل في العربية.

 

وتابعت صباح: "هو كان متجبر شوية، كان جبار، وطلبت الطلاق، في الأول عاند كتير أوي، وقال لا يمكن أطلق، قولتله خلصني، محبتش الخناق، ولا التمادي في الشرب، ولا حبيت أخطف واحد من زوجته، وفعلا طلقني، ولما حب يرجع يشوفني عملي فيلم (كانت أيام) 1970 من إنتاجه، وغنيت له فيه (يانا يانا) وكنا لسه بنحب بعض، وفضلنا سنين بنحب بعض من غير جواز، وكل يوم وأنا في الفندق كان يبعتلي وردة حمراء، ولما يلاقوه عصبي ييجوا ياخدوني عشان أهديه".


وأكدت صباح : "لما سامية جمال قالتله إنت اتجوزت صباح قالها أنا اتجوزت صباح الملكة، فكان بيحبني جدا".

تم نسخ الرابط