مها الصغير تعلن عودة والديها بعد انفصال٢٢ عامًا
أعلنت الإعلامية مها الصغير، عودة والديها مرة أخرى بعد انفصال دام ٢٢ عامًا، مشيرة إلى أن ما حدث هو قصة كان أبطالها والديها وشقيقها، والطبيب المعالج.
وأوضحت من خلال منشور لها عبر حسابها الرسمى، بموقع التواصل الاجتماعى انستجرام، قائلة :" في حاجه مهمه اوي عايزه كل العالم يعرفها، واكيد مش هعرف اكتب الكلام ده تاني.. أبطال القصه دي هم ابي وحياتي كلها والي يعرفني كويس يعرف ان محمد الصغير مش ابويا بس هو حب عمري والبطله التانيه هي اعظم ست في العالم ملكه العلايلي".
وتابعت قائلة: "قصه حب عشتها علي مدار كل يوم و كل ثانيه لغايه اللحظه حتي لما اتطلقوا كنت عارفه انه بيحبها و هي بتحبه و عمري ما شفته او شفتها سعيده غير و هي مراته .. المهم امي اتجوزت ابويا و هي من عائله ارستقراطيه و هو من عائله بسيطه و تحدت اهلها و قطعوها وهو لم يكن معاه سوي ١٠٠ جنيه و حصل مشاكل و اتطلقوا من ٢٢ سنه و يوم ما تعب و هو حواليه ناس كتيييييييير اوي (بس في الافراح فقط".
وأردفت: "طلب مني اطلب امي في التليفون و طلب يشوفها و جت له علي طول، يوم ما حس انه ضعيف اوي و تعبان بجد طلب ضهره و سنده الي بجد مش في المنظره و جت و طلب منها متزعلش منه و انها تتجوزه علي سنه الله و رسوله تاني واصدقاء الابطال في هذا الفيلم الجميل الي شهدوا هذه اللحظه هما انا و اخويا مصطفي و اخويا التاني الدكتور الي مسبنيش لحظه يحيي البستاني الدنيا اتدربكت و طلب مأذون و جه المأذون جوز ملكه العلايلي لمحمد الصغير علي سنه الله ورسوله".
واختتمت حديثها قائلة :" هذه العظيمه اتجوزته و هو محلتوش حاجه و في عز ضعفه و رجعت له و هو في عز ضعفه برده نام في حضنها و هو مرتاح اوي.. هو الان في امس الحاجه للدعاء لانه في لحظات حرجه اوي اوي اوي.. ادعوا له واسفه اني طولت عليكوا".
الجدير بالذكر، أن مصفف الشعر الشهير محمد الصغير ، أصيب بفيروس كورونا منذ فترة، ويتلقى العلاج فى المستشفى تحت الاشراف الطبى.
