دينا تكشف حقيقة خضوعها لعمليات تجميل: «عملت عملية واحدة في مناخيري»

كشفت الفنانة دينا حقيقة خضوعها لعمليات تجميل، وذلك من خلال فيديو نشرته عبر حسابها الشخصي على موقع «إنستجرام»، تحدثت خلاله عن الشائعات التي تطاردها بشأن خضوعها لعمليات تجميل لتغيير ملامح وجهها أو شكل جسدها.

وقالت دينا إن سؤالها عن عمليات التجميل أصبح من الأسئلة التي تتكرر كثيرًا، موضحة أن البعض يعتقد أنها خضعت لعدد من العمليات بسبب مظهرها، رغم تأكيدها أن شكلها طبيعي، قائلة: «قوليلي بجد، إنتِ عاملة كم عملية تجميل؟ دلوقتي ده سؤال طبعًا كل الناس بتسأله، وغير كده بيقولوا لي في وشي، وبيقولوا إني عاملة عملية تجميل، كل الناس متوهمة إني عاملة عملية تجميل».

وأضافت أن فكرة أن الشخص قد يمتلك مظهرًا طبيعيًا أصبحت صعبة التصديق لدى البعض، قائلة: «هو طبعًا أول ما تبقى طبيعية، ما بقاش حد بيصدقها، يعني لازم تبقى عاملة عملية تجميل، ما حدش بيصدق خالص».

وأوضحت دينا أنها لم تخضع لعمليات تجميل سوى عملية واحدة في أنفها، أجرتها منذ نحو أربع أو خمس سنوات، قائلة: «الحقيقة إن أنا مش عاملة عمليات تجميل، إلا عملية واحدة وهي مناخيري، وعملتها من أربع خمس سنين، يعني مش من وأنا عيلة صغيرة، عملتها قريب».

وكشفت أن السبب وراء إجرائها عملية الأنف كان مرتبطًا بشكل خدودها أثناء التصوير، موضحة: «خدودي سقطت، فالتصوير هيطلع مش مضبوط»، مؤكدة في الوقت نفسه أنها حرصت على أن يظل شكل أنفها طبيعيًا بعد العملية، قائلة: «بس عملت مناخيري بنفس شكلها، يعني لما أضحك لازم تنزل مني، لأن أنا بحب الطبيعة».

وتحدثت دينا عن تفضيلها للمظهر الطبيعي، خاصة فيما يتعلق بعمليات تجميل الجسم، مؤكدة أنها ترى أن التغيير الجمالي يجب ألا يكون واضحًا بشكل مبالغ فيه، قائلة: «أنا بحب الطبيعة، أنا بحب الجسم الطبيعي وخصوصًا الأجسام، يعني أنا بشوف إن العمليات بتاعت الأجسام كلها باينة».

وتابعت: «أنا بالنسبة لي التجميل يعني حاجة تتعمل وما تبانش، مش حاجة تتعمل وتبين، لكن لما تبقى باينة أوي كده إنك عاملة عملية، ينفع؟ طب فين اللذاذة يعني؟ فين الحلاوة؟ الحلاوة إن يبقى باينة إني مش عاملة».

وأكدت دينا أنها لا تنزعج من اعتقاد البعض بخضوعها لعمليات تجميل، معتبرة أن وصول الناس إلى هذا الاعتقاد قد يكون دليلًا على نجاحها في الحفاظ على شكلها، قائلة: «الحقيقة إن أنا مش عاملة عمليات تجميل وأنا عارفة، ونفسي في الصندوق، أنا عارفة إن إنتوا كلكم بتقولوا إني عاملة عملية تجميل».

وأضافت: «طبعًا أنا مش فارق معايا لأن أنا يعني هتقولوا عاملة عملية تجميل، مش أنا الوحيدة اللي هبقى عاملة يعني، إنما هبقى مبسوطة لأن قد كده أنا عرفت أحافظ على نفسي، لدرجة إن الناس فاكرة إن أنا عملت حاجات زي كده، يبقى أنا لازم أخد جايزة».

وشددت دينا على أن الحفاظ على الشكل والجمال يحتاج إلى مجهود، موضحة أن الوصول إلى نتيجة جيدة لا يأتي بسهولة، قائلة: «يا جماعة الجمال مش سهل، عشان الناس تحافظ على نفسها لازم تتعب، مفيش حلاوة من غير نار، علشان تلاقوا في الآخر حاجة كويسة لازم تشقوا عليها».

واختتمت دينا حديثها بالتأكيد على أن الكمال غير موجود، مطالبة الجمهور بعدم تصديق كل ما يتم تداوله، قائلة: «عشان في الآخر محدش كامل، ويا رب أكون قدرت أفهمكوا شوية حاجات، ومش كل حاجة تسمعوها تصدقوها، مش كل اللي بيتقال يبقى صح».