ساموزين لـ"وشوشة": تعمدت كسر الصورة التقليدية عني.. وأفكر في المستقبل وتطوير الموسيقى

يحرص الفنان ساموزين خلال الفترة الأخيرة على تقديم أعمال غنائية مختلفة من حيث الفكرة والشكل الموسيقي، في محاولة لتقديم صورة جديدة للجمهور والتأكيد على قدرته على التطور ومواكبة التغيرات التي يشهدها عالم الموسيقى، وهو ما ظهر في عدد من أعماله الأخيرة.

وفي تصريح خاص لـ"وشوشة"، كشف ساموزين أن اختياره تقديم أعمال مختلفة وجريئة كان مقصودًا لكسر الصورة التقليدية المرتبطة به، مؤكدًا أنه يحرص دائمًا على تطوير نفسه وطريقة تواصله مع الجمهور.

وقال: "دايمًا بكون سعيد لما الناس ترجع تقولي كل فترة إيه الحاجة المختلفة أو التغيير اللي إنت بتعمله، وده كان مقصود عشان أكسر الصورة الموجودة عن ساموزين".

وأضاف: "اللي متابعني دايمًا بيعرف إني بحاول أشتغل على نفسي، وأفكر مع نفسي إزاي أتعامل مع جمهوري، وإزاي أتعامل مع السوشيال ميديا، وإزاي أتعامل مع كل حاجة أنا بعملها، حتى رسالة الأغنية اللي بقدمها، لأن كل أغنية ليها رسالة وليها فكرة بتعبر عني وبتعبر عن ناس كتير، وده كان مهم جدًا بالنسبة لي إني أقدمه".

وأوضح ساموزين أنه يحرص على مواكبة التطورات في عالم الموسيقى والتكنولوجيا، مؤكدًا أن تفكيره دائمًا يتجه نحو المستقبل، قائلًا: "رسالتي للجمهور هي دايمًا إني بفكر لقدام، وبفكر مع التكنولوجيا، وبفكر الموسيقى رايحة فين، عشان أعرف أوصل لهم كل حاجة أنا بقدمها".

وتابع: "دي حاجة مهمة جدًا بالنسبة لي، إني دايمًا أكون متطور في الموسيقى، وعارف إيه اللي بيحصل حواليا، لأن العلم كويس في كل المجالات".

وأعرب ساموزين عن سعادته بتفاعل الجمهور مع أعماله الأخيرة، قائلًا: "رسالتي للجمهور دايمًا يا رب يعجبكم الألبوم، ويا رب يعجبكم كل الفترة اللي فاتت، وكل الأعمال اللي قدمتها تكون عجبتكم، وأنا كمان مبسوط من الجمهور، لأنه بدأ يركز مع كل الأغاني اللي نزلت خلال السنة، وبدأ يكون فيه تفاعل، وبدأوا يفهموا الفكرة".

واختتم حديثه موضحًا أنه تعمد عدم الكشف عن تفاصيل فكرته بشكل مسبق، وترك للجمهور مهمة اكتشافها من خلال الأعمال نفسها، قائلًا: "أنا كنت مقدم الفكرة ومحبتش أتكلم عنها كتير، حبيت إن الناس هي اللي تشوف في الآخر، وتشوف النتيجة رايحة لفين وإزاي".

وكانت آخر أعمال ساموزين الغنائية أغنية "I Love You Moot"، من كلمات قصي باسل، وألحان وتوزيع معتز أمين، وإخراج ساموزين.

وجاءت الأغنية بعد طرح ساموزين الميني ألبوم "باب وخبط"، الذي ضم أربع أغنيات متنوعة، وهي "باب وخبط"، و"ميتعزش"، و"انهيار"، و"سما صافية"، وقدم من خلال العمل أشكالًا موسيقية مختلفة، إلى جانب عودته للإخراج بعد غياب استمر 15 عامًا.