إبراهيم أردني لـ"وشوشة": بحب لطيفة جدًا.. وإنسانة محترمة قبل ما تكون فنانة

كشف الملحن والموزع إبراهيم أردني في تصريح خاص لـ"وشوشة" عن تفاصيل مشاركته في ألبوم الفنانة لطيفة مؤكدًا أن تعاونه معها بدأ منذ فترة من خلال أغنيتي “سوري” وأخبارك إيه اللتين طُرحتا ضمن ألبومها السابق.

وقال إبراهيم أردني:"تعاوني مع لطيفة بدأ من بدري، وبعد نجاح الشغل اللي جمعنا في الألبوم اللي فات، هي كلمتني وقالتلي إنها عايزة أغاني جديدة، وسمعتها أكتر من فكرة، ومن بينهم أغنية (أنا بعجبني) اللي هتنزل يوم 5 إن شاء الله، وكمان في أغنيتين تاني هما (أجيله كده) و(في خطر)، والحقيقة الأغاني التلاتة قريبين جدًا لقلبي وحاسس إنهم هيعجبوا الجمهور".

وعن كواليس العمل معها، قال:"لطيفة زي القمر والعسل، والكواليس كانت جميلة جدًا، وانبسطت للغاية بالشغل معاها، وده شرف كبير ليا لأنها فنانة كبيرة وليها قيمة وتاريخ".

وأضاف ابراهيم اردني :"بصراحة من أسهل وأمتع الأغاني اللي اشتغلت عليها في حياتي، ويمكن ده يرجع للتفاهم الكبير بينا، أنا كأردني حسيت إن الشغل مع لطيفة سهل وجميل جدًا، لأنها بتدي الفنان راحة وثقة أثناء العمل".

ووجّه إبراهيم أردني رسالة خاصة إلى لطيفة، قائلًا:"أنا بحب لطيفة جدًا، وبعتبرها من الناس العزيزة على قلبي. وبعيدًا عن المزيكا، هي إنسانة محترمة جدًا، وبتحب شغلها بشكل كبير، وبتتابع كل التفاصيل لحظة بلحظة، وده سبب مهم في نجاحها المستمر. هي فنانة كبيرة، ومهما اتكلمت مش هوفيها حقها، والشغل معاها تجربة قوية ومميزة جدًا بالنسبة لي".