شريف مكاوي لـ"وشوشة": أنغام منحتني الحرية الكاملة في أول تعاون بيننا
كشف الموزع الموسيقي شريف مكاوي، كواليس مشاركته في ألبوم الفنانة أنغام الجديد دي روحي، من خلال توزيع الأغنية الرئيسية التي تحمل اسم الألبوم، إلى جانب أغنية محاصرني، متحدثًا عن تفاصيل التعاون مع أنغام والشاعر تامر حسين والملحن عزيز الشافعي، وأسباب خروج الأغنيتين بشكل مختلف.
بداية التعاون مع أنغام
وقال شريف مكاوي في تصريح خاص لـ"وشوشة" إن فكرة التعاون بدأت عندما كانت أنغام تبحث عن شكل موسيقي جديد ومختلف تقدمه في موسم الصيف، موضحًا:"أنغام كان عندها من فترة فكرة إنها تقدم لون جديد ومختلف عليها شوية، وعزيز الشافعي كلمني وشرحلي الخطة والأفكار اللي كانوا بيشتغلوا عليها، وبعد ما استقر على لحن (دي روحي) بعتلي الأغنية هو وتامر حسين، وبدأت أشتغل عليها، والحمد لله أنغام عجبتها جدًا".
وأضاف شريف مكاوي قائلاً:"بعدها أنغام وعزيز الشافعي اختاروني كمان لتوزيع أغنية (محاصرني)، وبعد ما خلصت التوزيع كانوا مبسوطين جدًا بالنتيجة، وبدأنا تسجيل الأغنيتين، ومن هنا بدأت رحلة التعاون".
دي روحي كانت تحديًا كبيرًا
وأكد شريف مكاوي أن أغنية دي روحي كانت من أصعب التجارب التي خاضها كموزع موسيقي، لأنها تعتمد على فكرة موسيقية غير تقليدية.
وأوضح شريف مكاوي:"دي روحي فكرة مختلفة جدًا، سواء في نوع الكلام أو طريقة التلحين، وكان فيها جرأة كبيرة من عزيز الشافعي، وكان التحدي بالنسبة لي إني أوصل الإحساس الموسيقي من غير ما يكون على حساب جمال الكلمات أو اللحن، وده احتاج توازن كبير".
وتابع شريف مكاوي حديثه قائلاً:"الثقة اللي حصلت عليها من أنغام وعزيز الشافعي وتامر حسين خلتني أشتغل براحة، وتامر حسين كان ضلعًا مهمًا جدًا في الأغنية، والحمد لله قدرت أقدمها بالشكل اللي كنا بنتمناه".
أنغام لا تترك شيئًا للصدفة
وتحدث شريف مكاوي عن تجربته الأولى مع أنغام، مؤكدًا أنها فنانة تمتلك رؤية موسيقية دقيقة.
وقال:"أنا أعرف أنغام من سنين طويلة وإحنا أصحاب، لكن دي أول مرة نشتغل مع بعض، ولما اشتغلت معاها اكتشفت إنها فنانة بكل معنى الكلمة، ذكية جدًا وعندها خبرة ومخزون موسيقي كبير، ومبتسيبش أي حاجة للصدفة، وبتتابع كل التفاصيل سواء في التسجيل أو التنفيذ، وحتى لو مش موجودة بتكون متابعة باستمرار".
وأضاف:"أنغام بتدي الفنان حرية كاملة يشتغل، لكن لو حست إن في حاجة ممكن تأثر على شخصيتها الموسيقية بتتدخل، وده بيكون مبني على خبرة سنين طويلة، وعلشان كده رأيها بيكون في مكانه".
المذاكرة سر نجاح دي روحي ومحاصرني
وكشف شريف مكاوي عن طريقته في العمل، مؤكدًا أنه لا يبدأ تنفيذ أي أغنية فور استلامها.
وقال:"أنا من الشخصيات اللي بتحب تذاكر جدًا قبل ما تدخل أي شغل، الأغنية لازم تعيش معايا يومين أو تلاتة، وساعات أسبوع كامل، قبل ما أدخل الاستوديو. بفضل أفكر فيها وأسمعها وأتخيل هتتوزع إزاي".
وأضاف شريف مكاوي:"وده اللي حصل في (دي روحي) و(محاصرني)، كنت مذاكر الأغنيتين جدًا قبل التنفيذ، وده ساعد إن كل واحدة تطلع بشخصية مختلفة تمامًا عن التانية، رغم إني موزعهما الاتنين".
علاقة خاصة مع عزيز الشافعي وتامر حسين
كما أشاد شريف مكاوي بفريق العمل، مؤكدًا أن العلاقة التي تجمعه بعزيز الشافعي وتامر حسين تتجاوز حدود العمل.
وقال:"تامر حسين أخويا وصاحبي من سنين، وعزيز الشافعي أعرفه من زمان جدًا، وإحنا علاقتنا مش شغل وبس، فيها مودة وحب واحترام، وده بيسهل أي تعاون بينا، وبيخلي كل واحد يطلع أفضل ما عنده".
واختتم شريف مكاوي حديثه قائلًا: "بحب أشكر عزيز الشافعي وتامر حسين على الثقة الكبيرة، وكمان المهندس خالد سند على الميكس الرائع في (محاصرني)، لأنه قدر يوصل الإحساس اللي كنا عايزينه، وسعيد جدًا إن أول تعاون ليا مع أنغام خرج بالشكل ده".
