دنيا عبد العزيز لـ"وشوشة": التيك توك للتسلية.. ونجلاء فتحي نصحتني من بدري متحطيش مكياج

كشفت الفنانة دنيا عبد العزيز خلال ندوتها في موقع وشوشة عن رأيها في تطبيق تيك توك، كما تحدثت عن نصيحة الفنانة نجلاء فتحي لها في بداية مشوارها، وأثر دخولها مجال التمثيل في سن مبكرة، بالإضافة إلى التغيرات التي أحدثتها الأمومة في حياتها.

التيك توك للتسلية وليس أكثر

وقالت دنيا عبد العزيز في تصريحاتها لـ"وشوشة":"والله أنا شايفة التيك توك حاجة فاني، فيه حاجات لذيذة بتفرج عليها، زي الناس اللي بتقلد أصوات أو بتشغل أغنية ويعملوا عليها تمثيلية بالنسبة لي هو حاجة بتسليني، لكن مش باخده بجد، لأنه في النهاية وسيلة ترفيه وتسليتي".

نصيحة نجلاء فتحي

وتطرقت دنيا عبد العزيز إلى نصيحة تلقتها من الفنانة نجلاء فتحي في بداية مشوارها قائلة:"قالتلي متحطيش مكياج خالص، وساعتها كنت صغيرة وحابة شكلي وعايزة أكبر بسرعة، فكنت طول الوقت بحاول أغير في شكلي، ومسمعتش كلامها غير متأخر، وبعدها عرفت قد إيه كانت نصيحة مهمة".

التمثيل المبكر منحني الخبرة والثقة

وعن دخولها مجال التمثيل في سن صغيرة، أوضحت دنيا عبد العزيز:"ساعدني في حاجات كتير ومش هقول ضرني لكنه حملني المسؤولية من وأنا طفلة كان عندي شغل ومدرسة ومواعيد تصوير، فكنت لازم أوازن بين كل حاجة، وده خلاني أتعلم الالتزام بدري".

وأضافت:"وفي نفس الوقت إحساس الشهرة وأنا صغيرة كان ممتع بالنسبة لي والأهم إنه خلاني أشتغل مع نجوم كبار جدًا، أي حد يحلم يشتغل معاهم، وده إداني خبرة كبيرة وثقة في نفسي من بدري".

الأمومة غيرت حياتي بالكامل

كما تحدثت دنيا عبد العزيز عن تأثير الأمومة على شخصيتها، مؤكدة أنها غيرتها بشكل كبير، وقالت:"الأمومة غيرت فيا كل حاجة، وجيتي على الجرح أنا أصلًا كنت من الشخصيات اللي متعرفش تجيب لنفسها حتى كوباية مية، ولو محدش جابهالي مكنتش هقوم أجيبها، كنت مدلعة جدًا".

واختتمت حديثها مازحة:"دلوقتي بقيت بطبخ، مع إني زمان مكنتش أعرف الفرق بين البصل والثوم، وعمري ما دخلت المطبخ، لكن الهانم ممشياني ميري".