محمد شميس: عمرو دياب الأكثر جرأة في اختيار الكلمات

أكد الناقد الموسيقي محمد شميس أن ألبوم عمرو دياب الأخير لم يقدم قوالب موسيقية جديدة، موضحًا أن الهضبة لا يزال يعتمد على الألوان التي اعتاد الجمهور عليها، لكنه في المقابل يواصل تميزه في اختيار الكلمات والجرأة في تقديم مفردات مختلفة.

وقال محمد شميس في تصريح خاص لـ“وشوشة”: “على مستوى الموسيقى مقدرش أقول إن عمرو دياب عمل حاجة جديدة خالص، بالعكس هو بيقدم نفس الأشكال اللي معروف بيها، زي الفلامنكو، والـDancehall، والمقسوم، واللاتين، ودي الألوان اللي بيقدمها في ألبوماته الأخيرة".

وأضاف: “أبرز حاجة لفتت انتباهي في الألبوم إن في أغاني كتير فيها أصوات معمول جزء منها بالذكاء الاصطناعي، وده واضح بالنسبة لي وبالنسبة لموسيقيين كتير، وبيخلينا نسأل: هل الموزعين بقوا في خطر؟ زمان كنت أقدر أعرف الموزع من أول ما الأغنية تشتغل، دلوقتي مبقتش أعرف إلا لما أشوف اسمه مكتوب".

وتابع: “الذكاء الاصطناعي موجود كمان في ألبوم تامر حسني، لكن هناك ظهرت مشاكل واضحة في بعض الأغاني، أما عند عمرو دياب فالأمر كان أقل إزعاجًا، ومافيش أخطاء واضحة بنفس الشكل".

وأشاد شميس باختيارات الهضبة الفنية، قائلًا: “عمرو دياب بيغني وأداؤه مميز، واختياراته للأغاني موفقة جدًا، وهو أجرأ فنان على الساحة في موضوع الكلمات، لأنه دايمًا بيحاول يغير قاموس الغناء ويبعد عن الأفكار التقليدية".

واستشهد بأغنية “يا قمر” التي كتبها مصطفى حدوتة، مؤكدًا أن جرأة عمرو دياب ليست جديدة، موضحًا: “هو طول عمره بيغير في القواميس، قبل كده غنى (أنا زبونك الساقع المضمون)، وغنى (برج الحوت)، ودائمًا بيحب يقدم تعبيرات جديدة، وبعدها السوق كله يبدأ يقلده ويستخدم نفس المصطلحات".

واختتم حديثه قائلًا: “لو عمرو دياب مش موجود، كانت الأغاني هتفضل بتلف في نفس الدائرة، هو دايمًا بيحاول يكسر الملل ويقدم أفكار مختلفة، ودي أكتر حاجة بتميزه عن أي حد في الساحة".