بعد تصدر البرومو الترند.. ماذا قال النقاد عن فيلم «خلي بالك من نفسك»؟

أثار البرومو الرسمي لفيلم «خلي بالك من نفسك»، بطولة ياسمين عبد العزيز وأحمد السقا، حالة من الجدل والاهتمام فور طرحه، بعدما حقق نسب مشاهدة مرتفعة خلال وقت قصير، وهو ما فتح باب التساؤلات حول قدرة الفيلم على تحقيق النجاح نفسه عند عرضه في دور السينما، وكذلك حول مدى جاذبية الثنائية التي تجمع بين ياسمين عبد العزيز وأحمد السقا بالنسبة لجمهور اليوم.

وفي هذا السياق، استطلع «وشوشة» آراء عدد من النقاد الفنيين، وهم أحمد سعد الدين، وماجدة خير الله، ورامي متولي، لمعرفة توقعاتهم بشأن الفيلم، وهل تكفي المشاهدات المرتفعة للبرومو للتنبؤ بنجاح العمل، أم أن الحكم الحقيقي سيظل مرهونًا برد فعل الجمهور بعد عرضه.

أحمد سعد الدين: «البرومو كشف الأكشن والكوميديا.. لكن نجاح الفيلم لن يُحسم إلا بعد عرضه»

قال الناقد الفني أحمد سعد الدين في تصريح خاص لـ"وشوشة": “بصي هو البرومو يعني بيقول حاجتين، بيقول إن في أكشن.. ودي حاجة طبيعية بالنسبة للسقا، وياسمين، وفي لمحة كوميدية، ولكن السؤال الأساسي.. هل النهاردة بعد غياب طويل سواء للسقا أو لياسمين عن السينما.. هل ممكن الجمهور يتقبلهم نفس ما كان بيتقبلهم من خمس سنين؟ ما أقدرش أجاوب، إلا لما ينزل الفيلم، ولكن أقدر أقولك إن السقا وياسمين هما ثنائي فني جيد.. بس مش لإيه؟ للجيل الصغير، مش لجيل الـ18 والـ20 والـ25، للجيل اللي قبله، اللي كانوا بيحبوهم من وهما صغيرين".

وعن تحقيق البرومو مشاهدات مرتفعة، أوضح قائلاً: “حقق مشاهدات لأن الناس عايزة تشوف هما بيعملوا إيه، مش حقق مشاهدات إن الناس مستنياه، الفارق إن أنا في ناس عندها فضول الناس دي هتعمل إيه يا جماعة".

وحول توقعاته لنجاح الفيلم، قال: “ممكن تنجح، ممكن تنجح لكن… تكسر الدنيا أصبحت لأ. لأن دلوقتي الأجيال اختلفت، وأصبح السقا وياسمين عبد العزيز جيل وسط مش جيل شباب".

وأضاف: “يعني إنتي النهاردة لما تيجي تقولي ياسمين عندها كام سنة؟… في النص الثاني من الأربعينيات. السقا في النص الأخير من الخمسينيات. فما أصبحش إن دول.. الشباب اللي هما الـ18 والـ20 يقولوا دول مثل أعلى لينا أو عاوزينا.. أو زينا. فهما ممكن يحققوا نجاح لكن الفرقعة القوية لأ، صعب. يعني حتى الآن إحنا بنتكلم كده برضه توقعات".

ماجدة خير الله: «تركيبة مختلفة قد تثير فضول الجمهور»

من جانبها، رأت الناقدة الفنية ماجدة خير الله في تصريح خاص لـ"وشوشة" أن اجتماع ياسمين عبد العزيز وأحمد السقا يمثل توليفة جديدة قادرة على جذب الانتباه، وقالت: “هو التوليفة غريبة وجديدة.. وأعتقد.. يعني ممكن.. يعني تثير فضول المشاهد يعني.. فأعتقد ممكن إنها تنجح يعني على الأقل في الأسابيع الأولى".

وأضافت، تعليقًا على المشاهدات المرتفعة التي حققها البرومو : “تركيبة غريبة.. مختلفة.. فأعتقد إنها ممكن إنها تثير اهتمام الناس يعني".

رامي متولي: «الفيلم يمتلك كل عناصر النجاح.. واجتماع السقا وياسمين خطوة ذكية»

أما الناقد الفني رامي متولي، فتوقع أن يحقق الفيلم إيرادات قوية عند عرضه، قائلًا في تصريح خاص لـ"وشوشة":  “والله أعتقد بنسبة كبيرة آه، لأن أحمد السقا وياسمين الاتنين نجوم شباك بشكل أو بآخر. يمكن ياسمين بعدت شوية بأن هي عملت مسلسلات ودخلت المساحة دي، بس أعتقد إن في أزمة إنتاج عموماً مفيش العدد الكبير اللي بينتج. في المقابل الفيلم واضح جداً إنه بيمزج الأكشن بالكوميديا والرومانسية، فإحنا قدامنا كده يعني خلطة أعتقد إن هي ممكن تجذب قطاعات كبيرة من الجمهور، والاتنين عندهم قاعدة جماهيرية كبيرة تسمح إن الفيلم طبعاً يحقق نجاحات كبيرة".

وأضاف: “يعني هيلحق موسم الصيف وهتكون الامتحانات خلصت، فبنسبة كبيرة جداً ممكن يعمل إيرادات كويسة يعني".

وفي تعليقه على ثنائية ياسمين عبد العزيز وأحمد السقا، قال: “أعتقد آه طبعاً، لأن هي التوليفة دي بتروح لأي قطاع من الجمهور مفيش فيها مشاكل خالص. الاتنين نجمين متواصلين مع أجيال مختلفة".

واستكمل: “العمل نفسه أعتقد إنه بيضم اسمين نجمين شباك وده ذكاء من الاتنين، يعني فكرة دايماً إن أنا أعمل فيلم بيكون بطله شخص واحد بس، نجم أوحد يعني، الفكرة دي مابقتش مستحبة زي زمان. بالعكس، لما يبقى الفيلم فيه نجمين شباك مع بعض، ده بيزود إقبال الجمهور عموماً وبالتالي الإيرادات".

واختتم حديثه قائلاً:“فأعتقد من ناحية أو من أخرى يعني، ده ذكاء كبير جداً من نجمين في حجم أحمد السقا وفي حجم ياسمين عبد العزيز إن هم الاتنين يشتركوا مع بعض عشان يطلعوا فيلم، فهنا مابيتقالش إن ده فيلم أحمد أو فيلم ياسمين، قدر مابيتقال إن دي خطوة ذكية من نجمين شايفين السوق كويس جداً وبيعملوا الحاجة اللي تقربهم من قطاعات، وحاجة تخليهم ينجحوا أكتر".

حيث تعكس آراء النقاد تباينًا واضحًا في التوقعات قبل طرح الفيلم؛ فبينما يرى البعض أن النجاح الحقيقي لن يتحدد إلا بعد عرضه في دور السينما، يؤكد آخرون أن اجتماع أحمد السقا وياسمين عبد العزيز، إلى جانب المزج بين الأكشن والكوميديا والرومانسية، يمنح «خلي بالك من نفسك» فرصة قوية لتحقيق حضور جماهيري وإيرادات لافتة خلال موسم عرضه.