هاني فرحات لـ”وشوشة”: بتأثر في الحفلات لأن الموسيقى حالة إنسانية مش تصنّع
كشف المايسترو هاني فرحات عن طبيعة تفاعله العاطفي خلال الحفلات الموسيقية، مؤكدًا أن تأثره أو دموعه أثناء العزف أو الغناء ليس مفتعلًا، وإنما انعكاس لحالة فنية وإنسانية صادقة يعيشها مع الموسيقى.
وفي تصريح خاص لـ”وشوشة” قال هاني فرحات: “مفيش سر، أنا بعتبرها نعمة.. لما الظروف بتكون مناسبة والصوت حلو والمزيكا معمولة بإحساس، بدخل في حالة من التفاعل الكامل، ومليش علاقة مين بيبص عليا، أنا بتعزل تمامًا وبدخل في المزيكا”.
وتابع: “العياط زي الضحك بالظبط، إحساس بيتولد جواك نتيجة الموسيقى، ومش بقرر أعمله أو أمنعه، هو إحساس طبيعي بيتحرك معاك حسب الحالة”.
وأضاف: “في ناس شايفة إن ده ممكن يكون غريب على المجتمع، لكن الموضوع ملوش علاقة بقوة أو ضعف، هو إحساس إنساني بحت، والمزيكا نفسها بتأثر فينا بطبيعتها، نغمة واحدة ممكن تفرحك ونغمة تانية تدخلّك في حالة مختلفة تمامًا”.
واختتم حديثه قائلًا: “لما بدخل الحالة دي ببقى معزول عن الواقع، ولو كنت بمثل أي إحساس يبقى ده مش حقيقي، لأن اللي بيحصل هو صدق لحظي ناتج عن إحساس حقيقي بالموسيقى”.
نبذة عن المايسترو هاني فرحات
يُعد المايسترو هاني فرحات واحدًا من أبرز قادة الأوركسترا في الوطن العربي، حيث نجح خلال السنوات الماضية في تقديم حفلات ومشروعات موسيقية ضخمة داخل مصر وخارجها، وارتبط اسمه بكبار نجوم الغناء العربي، ليصبح من الأسماء المؤثرة في تطوير شكل الحفلات الموسيقية وتقديمها بصورة عصرية تجمع بين الأصالة والتجديد.
وقاد العديد من الحفلات العالمية والمهرجانات الكبرى، وشارك في تقديم تجارب موسيقية مختلفة جمعت بين الأوركسترا الكلاسيكية والأغنية العربية الحديثة، ما جعله من أبرز الأسماء التي ساهمت في نقل الحفل الموسيقي العربي إلى مستوى إنتاجي وفني جديد يواكب العروض العالمية.
