عمرو أديب بعد القمة: “الأهلي بينكد عليا شخصيًا.. ونفس السيناريو بيتكرر كل مرة!”
علق الإعلامي عمرو أديب على فوز الأهلي بثلاثية نظيفة على الزمالك في قمة الدوري الممتاز، وذلك خلال برنامجه الحكاية المذاع عبر قناة MBC مصر.
“مفيش جديد”.. انتقاد حاد للأداء
قال عمرو أديب: «مفيش جديد.. نفس الغلاسة ونفس الرزالة.. مفيش حاجة بتتغير»، مضيفًا: «الأهلي قرر فجأة يبقى فريق بطولات وتبقى عنده روح الفانلة الحمراء».
وتابع: «الأهلي قرر يعمل كل الأشياء الرخمة والرزلة، والزمالك هو اللي إدى الكرة للأهلي للتسجيل، وحسام عبد المجيد سبب أهداف الأهلي».
مقارنة بين الفريقين
وأضاف: «الأهلي خد اللي هو متعود عليه، والزمالك خد اللي هو متعود عليه وهو الزعل والنكد»، مشيرًا إلى أن الزمالك واجه فريقًا يضم نجومًا كبارًا مثل محمود حسن تريزيجيه وإمام عاشور وأشرف بن شرقي.
كما أشار إلى مشاركة أحمد سيد زيزو في الدقائق الأخيرة، قائلاً: «فرقة منزلة زيزو اللي بـ80 مليون جنيه بيلعب آخر 5 دقايق، لكن إحنا بنكمل مرتباتنا لآخر الشهر».
“مسألة شخصية” مع القمة
واستكمل: «الأهلي معندوش مانع يخسر الدوري والكأس لكن أهم حاجة يكسب مباراة القمة وينكّد على عمرو أديب»، معتبرًا أن الأمر تحول إلى مسألة شخصية.
وتساءل: «فين العدل؟ هو الأهلي لعب بنكلة السنة دي ولا عمل أي حاجة طول الموسم؟»، مضيفًا: «كل اللي عمله إنه لعب ماتش النهاردة».
وأشار إلى إمكانية أن تخدم نتائج المباريات المقبلة الأهلي للفوز بالدوري، قائلاً: «هو ده يبقى عدل؟ مش المفروض من جد وجد».
واختتم حديثه: «أي ماتش أهلي وزمالك لازم يحصل السيناريو ده.. فين المنافسة؟»، متابعًا: «ليه الأهلي لما بيهاجم الزمالك بيبقى مفتوح، ولما الزمالك يهاجم الأهلي بيبقى مقفول؟»، مشبهًا هجوم الأهلي بقوله: «كان بيهاجم كأنه مطلع طائرات إف 16».
