هاني فرحات لـ”وشوشة”: الفن للاستمتاع وليس للمقارنة بين شيرين وأنغام
أكد المايسترو هاني فرحات رفضه لفكرة المقارنات بين الفنانين، مشددًا على ضرورة احترام مجهود وتاريخ كل فنان، وأن الهدف الأساسي من الفن هو إسعاد الجمهور وليس خلق منافسات أو انقسامات بينهم.
وفي تصريح خاص لـوشوشة تحدث هاني فرحات عن ظاهرة المقارنة بين النجوم، قائلاً: “هو أنا لازم أحترم شغل كل واحد ومجهود كل واحد، وإن كل فنان وفنانة عندهم صراعات عظيمة ومشاكل نفسية عظيمة علشان يبسطوني أنا الجمهور، فمينفعش أحط ترتيب هنا نمرة واحد وده نمرة اتنين، لازم أحترم مجهود كل واحد وتاريخ كل واحد”.
وتابع: “الناس دي بتموت نفسها علشان تسعد الجمهور وتسمعه حاجة حلوة، فعلشان كده شايف الفترة الأخيرة ظاهرة مش حلوة خالص إن يبقى فيه تحزّب لفنانين”.
وأضاف: “الفنانين كلهم بيتبسطوا علشان أنت تتبسط، مش علشان تخرم نفسك من واحد وتشجع واحد، ده في الكورة موضوع تاني خالص”.
وكذلك أوضح: “أهلي وزمالك وريال مدريد وبرشلونة دي كورة ومن حلاوتها المنافسة، إنما الفن معمول علشان أتمتع وأعيش إحساس ومشاعر، فمينفعش أحرم نفسي علشان بحب أنغام مسمعش شيرين عبد الوهاب أو علشان بحب فضل مسمعش وائل جسار”.
واختتم: “الحقيقة بلوم بعض الإعلام لأنهم زقوا في الحكاية دي بشكل مش لطيف ومش مبرر، ومحدش مستفاد حاجة.. مصر عندها شيرين وأنغام ودي حاجة حلوة”.
