«البصل خلاني مش عارف أبوس والفسيخ طلع دودو صغنطوطة».. احتفال الإعلاميين بشم النسيم
يحل اليوم عيد شم النسيم، وفي سياق احتفال الشعب المصري بهذا اليوم، الذي يتميز ببعض العادات المصرية القديمة تبدأ بتلوين البيض وأكل السمك.
وخلال السطور التالية يقدم لكم موقع "وشوشة" تقرير بأبرز ما قاله الإعلاميين حول احتفالهم بشم النسيم.
سمكة متعفنة ومتهللة وطلعت دودو
قالت الإعلامية ياسمين عز: «بمناسبة الربيع أو عيد الفسيخ بننصح الناس متتقلش ومتجيش واحدة تقول منتهي الصلاحية، صلاحية إيه يا مدام؟ هو أصلًا سمكة متعفنة متهللة، ياريتها منتهي الصلاحية، ده هو عدى مرحلة الصلاحية وطلع منه دودو صغنطوطو، كلي ما تبقى من الجثة بقى ودخلي البكتيريا النافعة والغير نافعة خليهم يتقابلوا ويعملوا كومباوند مع بعض، ويا سلام لو أنتِ حامل في الشهر الثالث، يسلوا النونو».
15 رغيف وهيغم عليكي
وأضافت ياسمين عز خلال حلقة اليوم من برنامج «كلام الناس» المذاع عبر شاشة MBC مصر: «يا شيماء أنت مش شايفاني؟ أنت مش شايفة غير الرنجة، وعقلك بقى بطروخة وهتاكلي لحد ما يغمى عليكي 15 رغيف بلدي ولا يهزك احتباس الأملاح».
حاضنة الفسيخة وأنت نايمة بس سوشي أحسن
وتابعت: «كان ربنا هداكي وأكلتي سوشي، إيه اللي رجعك تاني للفسيخ؟ أنت نايمة حاضنة فسيخة من كتر ما وحشاكي، وأنتِ وأخواتك بتسرقوا من بعض البطارخ».
علقي في بوقك فواحة
وأردفت: «أبقي علقي في بوقك فواحة علشان ولا معجون هينفع ولا نعناع هيشفع، هتطلعي الريحة من بيتكم إزاي وزيت الرنجة اللي بينبعث هتطلعيه إزاي، وهتفضلي تنتقديني لما أقول لك جوزك ريحته مسك العنبر وأنتِ ريحتك فسيخ وداخلة فيها بضوافرك، الله يسترك استحمي قبل ما تنامي».
وفي سياق أخر، احتفل الإعلامي عمرو أديب على الهواء اليوم عبر برنامجه «الحكاية» المذاع على قناة إم بي سي مصر، بليلة شم النسيم من خلال تناول الفسيخ، قائلا: «لسه في فسيخات في الحلويات».
البصل الأخضر خلاني مش هعرف أبوس
وتابع: «بس البصل الأخضر خلاني مش هعرف أبوس»، مضيفا: « الحياه مفيهاش غير متعتين بس منهم الأكل والمتعة الثانية هي القراءة بالبطارخ».
ذكريات شم النسيم
ومن جانب أخر، استرجعت الإعلامية إيمان عز الدين، خلال برنامج «الستات ميعرفوش يكدبوا» المذاع عبر شاشة سي بي سي، ذكريات شم النسيم مع جدتها، قائلة: «زمان جدتي كانت بتأكلنا الرنجة والفسيخ، وكانت تقولنا طول الوقت اعصروا ليمون كتير على الأكل علشان نكسر سمه».
