هدير عبد الناصر لـ"وشوشة": لا تشغلني مساحة الدور بقدر تأثيره
كشفت الفنانة هدير عبد الناصر عن رؤيتها لاختيار أدوارها الفنية، مؤكدة أن المعيار الأساسي بالنسبة لها لا يتعلق بحجم الدور، بل بمدى تأثيره في الأحداث واختلافه عن شخصيتها الحقيقية وما قدمته سابقًا.
وقالت هدير في تصريح خاص لـ«وشوشة»: «أنا مش بهتم بمساحة الدور على قد ما بهتم بتأثيره، وبحب دايمًا إن الشخصية تكون مختلفة عني وعن الأدوار اللي قدمتها قبل كده، وتكون مؤثرة في الأحداث، وده اللي خلاني أتحمس لشخصية “مريم” في مسلسل علي كلاي».
وأضافت عن تجربتها هذا العام: «فكرة إن المسلسل يتعرض وأنا لسه بصور، زي ما حصل في “الست موناليزا”، كانت جديدة عليا، لكن في نفس الوقت ليها ميزة كبيرة، وهي إني كنت بشوف ردود فعل الجمهور أول بأول، وده كان بيخليني متحمسة أكتر للشغل ومستنية الحلقة زي المشاهدين».
وتحدثت هدير عن تعاونها مع الفنانة مي عمر، قائلة: «بحب جدًا الشغل مع مي عمر، هي دايمًا بتشجعني وبتدعمني من أيام مسلسل “لؤلؤ”، وبشكرها على دعمها المستمر».
وأشارت إلى أن هناك مشاهد معينة جمعتها بمي عمر في «الست موناليزا» تركت أثرًا خاصًا لديها، موضحة: «أكتر مشهدين حبيتهم وكانوا قريبين لقلبي مشهد الصلح ومشهد العزاء، دول من أكتر المشاهد اللي أثرت فيا وفضلوا معايا».
