أحمد زعيم لـ"وشوشة": الذكاء الاصطناعي اجتاح الدنيا.. ووالدتي حبها عايش معايا لدلوقت
تحدث المطرب والملحن أحمد زعيم عن استخدام تقنية الذكاء الاصطناعي في أغنيته الأخيرة «مبكدبش»، كما كشف عن طبيعة علاقته بوالديه وتأثيرهما الكبير في حياته.
وقال أحمد زعيم في تصريح خاص لـ«وشوشة»، إن الذكاء الاصطناعي أصبح جزءًا أساسيًا من عالم الفن حاليًا، موضحًا: «خلينا نقول إن عصر الـAI اجتاح الدنيا، بقى موجود في الفيديوهات والمزيكا والتصميمات وفي حاجات كتير ممكن نستعين بيه فيها».
وأضاف أنه لجأ لاستخدام هذه التقنية خلال تصوير أغنية «مبكدبش»، بعد أن أراد تقديم فكرة مختلفة عن أعماله السابقة، قائلاً: «أنا كنت صورت قبل كده أغنية “حب تاني” وعملت أغنية “بعده هد حيل”، فكنت عايز أعمل حاجة مختلفة، والمخرج محمد شحاتة كان مستخدم الذكاء الاصطناعي بشكل بروفيشنال جدًا، وقال لي سيبها عليا وأنا عندي فكرة حلوة».
وتطرق أحمد زعيم خلال حديثه إلى علاقته بوالديه، مشيرًا إلى أنه كان يشعر في وقت سابق بأنه مقصر تجاه والده، لكنه أصبح أكثر حرصًا على التواصل معه. وقال: «القصة دي انتهت خلاص، أنا شخص سريع الحساب مع نفسي، يعني لما بعمل حاجة غلط ربنا بيرجعني بابتلاء أو مشكلة عشان أفوق، لأن الابتلاء في النهاية حب مش عقاب».
وأضاف: «في الفترة من 2021 لـ2023 كنت موجود كمطرب وملحن والحمد لله ربنا كرمني، لكن كنت حريص إن ما يعديش شهر غير لما أزور والدي في البحيرة، لأن الأب دايمًا عايز يشوف ابنه، ومجرد مكالمة أو رسالة مش بتكفي».
وأكد أن علاقة الأب والأم بأبنائهم هي أصدق أنواع الحب، قائلاً: «علاقة الأب والأم هي الحب الحقيقي، لأن أي علاقة تانية بيكون فيها شروط، لكن الأب والأم حتى لو الابن كان مقصر بيفضلوا يدعوله».
كما تحدث عن علاقته بوالدته الراحلة، مؤكدًا أن تأثيرها ما زال حاضرًا في حياته، حيث قال: «علاقتي بأمي كانت حاجة مش هتتكرر في حياتي، حبها لسه عايش معايا لحد دلوقتي، وربنا يرحمها».
واختتم حديثه بالإشارة إلى أن الرجل غالبًا ما يبحث عن الأمان الذي كان يشعر به مع والدته، موضحًا: «الراجل بيدور على إحساس الأمان اللي كان بيحسه مع أمه، وعلشان كده لما يقول عن واحدة إنها بتفكره بأمه، بيبقى قصده إحساس الأمان مش أي حاجة تانية».
