تامر نبيل: استمتعت بدوري في "حكاية نرجس".. والكواليس مليانة طاقة إيجابية
أعرب الفنان تامر نبيل عن سعادته بالمشاركة في مسلسل “حكاية نرجس”، مؤكدًا أن السيناريو وفريق العمل وشركة الإنتاج كانوا السبب الرئيسي في حماسه، إلى جانب استمتاعه بتقديم دور جديد عليه، مشيدًا بأجواء الكواليس وروح التعاون بين جميع الأبطال.
وفي تصريح لـ”وشوشة” قال تامر نبيل: “اللي حمسني للمسلسل إن السيناريو والحدوتة والكرو وشركة الإنتاج، كل عناصر العمل خلتني متحمس أكون موجود، وكمان الدور نفسه أنا مستمتع بيه جدًا، الدور جديد عليا، وأنا دايمًا بحاول أقدم حاجة مختلفة حتى لو في تفاصيل شبه أدوار قبل كده، لكن طريقة التناول وأسلوب الأداء لازم يبقوا متجددين، وده بييجي من قوة السيناريو”.
وأضاف: “مش أول مرة أشتغل مع أستاذة ريهام عبد الغفور، اشتغلنا قبل كده في “منعطف خطر” و”رشيد”، ودايمًا بستمتع بالشغل معاها وبرتاح جدًا في وجودها”.
وتابع: “الكواليس بينا حلوة جدًا، كلنا فريق واحد وعلى رأسنا أستاذة ريهام، وطاقة بطل العمل بتأثر على الكل، وكمان وجود حمزة العيلي وبسنت أبو باشا وأحمد عزمي ناس اشتغلنا مع بعض قبل كده ومبسوطين إننا متجمعين تاني، وسامح علاء رغم إن دي أول تجربة إخراج ليه لكنه مخرج كبير ومختلف”.
قصة مسلسل "حكاية نرجس"
يتناول قضية حساسة ونادرة في الدراما المصرية، وهي الألم الصامت الذي تعانيه النساء بسبب تأخر الإنجاب، وتأثير ذلك على حياتهن الزوجية والنفسية.
أبطال وصُناع مسلسل "حكاية نرجس"
يشارك في العمل نخبة من النجوم منهم حمزة العيلي، تامر نبيل، سماح أنور، دنيا ماهر، بسنت أبو باشا، أحمد عزمي، عارفة عبد الرسول، فيدرا إلى جانب فريق عمل متميز من تأليف عمار صابر، وإخراج سامح علاء، وإنتاج محمد مشيش بالتعاون مع “المتحدة ستوديوز”.