المؤلف أمين جمال يكشف لـ"وشوشة" كواليس مسلسل "قسمة العدل"

حقق مسلسل “قسمة العدل” تفاعلًا واسعًا منذ عرض حلقاته الأولى، حيث يناقش قضية حساسة تمس الأسرة المصرية، وهي حق الأب في تأمين مستقبل بناته في حياته، وهل يحق له أن يكتب لهن ممتلكاته كما يرى أم أن ذلك يتعارض مع الشرع والعُرف، حيث يعتبر ذلك العمل دراما اجتماعية تراهن على دفء العائلة وتفاصيلها الواقعية بعيدًا عن فكرة الشر أو الخير المطلق.

وفي تصريح خاص لـ”وشوشة”، قال المؤلف أمين جمال: “مسلسل “قسمة العدل” أولًا هو إنتاج المتحدة دينا كُريم بطولة إيمان العاصي، خالد كمال، روجدي الشامي، محمد جمعة، إيناس كامل، مجموعة من الممثلين المبهورين في الأداء”.

وتابع: “بالنسبة لفكرة المسلسل أنا مش أول مرة أعمل فيما يخص قضية المرأة، لأن الست المصرية هي ست عظيمة، الست المصرية الي هي بتنزل تشتغل وتساعد زوجها، والست الشقيانة زي ما بيتقال هي نصف المجتمع لأ تقريبًا هي كل المجتمع فهي ست عظيمة جدًا، أنا بحب اكتب فيما يخص قضايا المرأة من أيام مسلسل “إلا أنا” وحواديت إلا أنا سواء أمل حياتي أو ربع قيراط، أو حكايتي مع الزمان أو بنات موسى”.

وأضاف أمين: “هي الفكرة ابتدت من خلال هو الأب في حياته من حقه إن هو يكتب حاجة لأولاده زي ما هو شايف وهو حر لأولاده ولا ده ضد الشرع، فالموضوع مش ميراث الموضوع أن الأب عايش، فكرة الأب عندنا حتى لما كتب جزء لبنته أو خلى البنت مثل الولد هو ده في ظروف خلته يعمل كدا أن البنت دي اتطلقت وأن البنت دي جوزها بيضيقها، وحس من أخوها إنه هيبقى طمعان في الوكالة كلها حتى يأمن ولاده التانيين وبنته، ولذلك كان في عوامل ودوافع خلت الأب يعمل كدا". 

واستكمل حديثه قائلًا: "فالفكرة بدأت من خلال أن في بلد محافظة في مصر أب كتب البيت الي هو قاعد فيه لبناته الاتنين فإخواته طلعوا ضربوه وبهدلوا الدنيا، ولسه إحنا شايفين حاجة حصلت كدا من كام يوم، فالموضوع ده شدني جدًا، فكرة أن هل إخواته من حقهم يعملوا كدا، هو الأب بس آمن حياة بناته، فالنهارده الأعمام المفروض هما الي يدوا للبنات دي، المفروض البنات لو مكملتش تعليمها انتو تعلموها لو متجوزتش انتم تجوزوها ده واجبكم انتم كأعمام للبنات، أو واجبك أنت كأخ للبنت لأن مهما كان البنت هي بنت مينفعش تسيبها إنها تنزل تتبهدل، فلو إنت أخ أو عم هي ملزمة منك، فماذا لو أن أب قرر في حياة عينه أن هو يأمن بنته هل هو كدا غلط ولا هو كدا صح ده الي المسلسل بيشوفه”.

أما عن ردود الأفعال قال: “الحمدلله الناس مبسوطة ولسه الحلقات الجاية فيها مفاجآت كبيرة، أنا بحب الدراما الاجتماعية لأن التليفزيون معمول لكل الناس، ودراما العيلة دايمًا رهان كسبان، وأنا من عشاق أسامة أنور عكاشة، محمد جمال عبد القوي، وحيد حامد، محسن زايد، ومسلسلات زي “ليالي الحلمية”، “المال والبنون”، “ذئاب الجبل”، “أولاد عم آدم”، الأعمال دي مهما بتتعرض بنفضل نحس بحنين ليها”.

وتابع: “إحنا لينا طابع خاص في نوعية المسلسلات دي محدش يعرف يعمله زينا في الوطن العربي، وحبينا نقدم دراما اجتماعية بنوع مختلف، مش شر مطلق أو خير مطلق، ممكن ناس تشوف إن كرم ليه حق، وناس تشوف إن مريم ليها حق، أو عبدالحكيم، أو شوقي، كل الشخصيات لحم ودم، حبينا نقدم دفء العيلة المصرية، والناس لما حبت عبدالحكيم ومريم شافت نفسها فيهم”.

واختتم: “روجدِي الشامي حكى لي إن أب كان متخانق مع بنته وبعد ما شاف المسلسل راح صالحها، وبنت كانت متخانقة مع أبوها راحت صالحته بعد المسلسل، إحنا اجتهدنا وسبنا الباقي على ربنا، ولسه الحلقات الجاية فيها مفاجآت كتير”.

أما عن الكواليس تحدث قائلًا: “عايز أقول إن ربنا كرمنا بكاست التمثيل ده أستاذة إيمان العاصي، خالد كمال، روجدي الشامي، خالد أنور، دنيا ماهر، أحمد عثمان، كريم العمري، كاست تمثيل عاملين مباراة تمثيلية فيها استمتاع كبير جدًا، ومفيش ممثل واقف قدام الكاميرا ضعيف، الكل عامل دوره على أكمل وجه، والناس كانت ملتزمة مع المخرج الصديق أحمد خالد والأستاذة دينا كُريم، وتعاونّا كلنا علشان نخرج المسلسل بشكل يليق، وهو خد وقته في كتابة الحوار والمونتاج والتحضير والتصوير، وبشكر فريق الكتابة خالد أبو بكر وشادي أسعد”.

أبطال مسلسل "قسمة العدل"

مسلسل "قسمة العدل" يشارك في بطولته: إيمان العاصي، رشدي الشامي، خالد كمال، إيناس كامل، دنيا ماهر، عابد عناني، خالد أنور، ألفت إمام، دعاء حكم، كريم العمري، علاء قوقة، تقى حسام، دنيا صلاح عبد الله، ياسين مراد، عبير فاروق، وتأليف أمين جمال، وإخراج أحمد خالد، وإنتاج United Studios.