محمد أنور يدعم أحمد السقا بعد الهجوم عليه.. بهذه الكلمات
وجه الفنان محمد أنور رسالة دعم إلى الفنان أحمد السقا وذلك بعد موقفه الداعم لمحمد صلاح، ورسائله الموجهة إلى إدارة نادى ليفربول.
وشارك محمد أنور جمهوره ببوست يعبر من خلاله عن دعمه لأحمد السقا وذلك عبر حسابه الرسمي على موقع "إنستجرام".
وأرفق بالبوست تعليق جاء كالتالي:" احمد السقا فعلا ميجا ستار، فيه ناس بتقولها علي نفسها معملوش ربع تاريخه ولا اعمالهم هتعيش وهتعلم زي أعماله”.
وتابع محمد أنور قائلاً: "كل افلامه علامات في تاريخ السينما المصرية أحمد السقا اصبح ايقونه في الاكشن والناس في الشارع لما بتلاقي واحد قلبه جامد بتقوله انت فاكر نفسك احمد السقا ولا ايه".
وأكمل محمد أنور قائلاً:"ومحمد صلاح عمل تاريخ مشرف واصبح ملهم وخلي المستحيل ممكن ووصل لمكانه اظن مفيش حد عربي هيوصلها تاني علي الاقل طول ماحنا عايشين فبدل مانفرح اننا حضرنا ده لا بنحاول نهدى ونفرح فيه وبنتمني وقوعه بسرعة".
وأضاف: “وقبلهم مجدي يعقوب وعمرو دياب ومني زكي وخوض في اعراض ومين طلق ومين اتجوز ومين مات وغيرهم كتير”.
وأردف: "السوشيال ميديا مفيده احيانا وفيها ناس محترمه كتير وكلامهم مهم واراءهم محترمه حتي لو كان نقد سلبي لكنهم للاسف قله اما الغالبيه العظمي والاكثر تأثيرا علي السوشيال ميديا كلها ترندات هدم سواء في شخص او مجتمع وشتايم وتريقه واثاره فتن ودي بتأثر عالوعي الجمعي اكتر وانا نفسي بتأثر بده حتي لو كنت اعرف الشخص ده وعارف انه مايعملش كده لكني للاسف بصدق".
وتابع محمد أنور قائلاً: “السوشيال ميديا اصبحت مرعبه حقيقي وطلعت كل اللي في النفوس بقي سهل الواحد يطلع كل السواد اللي جواه في الحقيقه عالسوشيال ميديا من غير خوف لان محدش شايفه ولا هيحاسبه ومحدش بيحط نفسه مكان اللي بيشتمه ده انه مهما كانت نجوميته او مركزه وقيمته في المجتمع فهو في الاخر انسان زيك لما يقرأ الكلام ده او حد من اهله او اولاده ممكن يحصله ايه وهينام اليوم ده عامل ازاي ومحدش بيديله فرصه يدافع عن نفسه يمكن يبقي مظلوم، بس ازاي نسمع منه كده الترند هيبوظ”.
واختتم محمد أنور حديثه قائلاً: "المهم هو الترند .. هنستلم مين النهارده ونهينه هو واهله بسرعه مفيش وقت عشان بكره فيه ترند جديد وضحيه جديده هينام بكره معيط هو كمان".
أحمد السقا يدعم محمد صلاح
كما وجّه الفنان أحمد السقا رسالة دعم ومساندة للنجم العالمي محمد صلاح، على خلفية الأزمة الأخيرة التي يمر بها مع نادي ليفربول، مؤكدًا ثقته الكبيرة في قدراته ومشواره الكروي.
وقال أحمد السقا في مقطع فيديو نشره عبر حسابه الرسمي على موقع "إنستجرام": "عندنا مثل في مصر بيقول يا جبل ما يهزك ريح، ولو حد نسي أو مش فاكر، خليني أفكره إنت حققت كام بطولة مع ليفربول، إنت فخر العرب بجد، خلي ثقتك في نفسك تزيد ومتهزش".
وأضاف أحمد السقا موجهًا حديثه لقائد المنتخب الوطني: "ركز يا صلاح، لأن الأمل كبير عليك في بطولة أمم أفريقيا وكأس العالم، وإحنا بنحبك وكلنا وراك".