رحاب الجمل: وجدت نفسي في أدوار الشر

كشفت الفنانة رحاب الجمل عن سبب حبها لاختيار أدوار الشر في الأعمال الفنية.
وخلال السطور التالية ينقل لكم موقع وشوشة أبرز تصريحاتها خلال إستضافتها في برنامج "ساعة ونس" مع الإعلامي مراد مكرم المذاع عبر شاشة "CBC سفرة".

أكدت الفنانة رحاب الجمل أنها في البداية كان المخرجون يحصرونها في أدوار الشر، لكن ذلك لم يسبب لها أي أزمة، وقالت:"يعني إحنا ساعات بنسمع من فنانين يقول لك المخرجين حاصريني في أدوار الشر… بس لا، أنا كنت مبسوطة بكده. مبسوطة إني لقيت حاجة أنا فعلاً شاطرة فيها وناجحة فيها. بالعكس، في ناس تانية بتقعد تخبط وتعمل أدوار كده وأدوار كده، ومش عارفة فين نقطة قوتها أو إيه الحاجة اللي ناجحة فيها وتقدر تقدمها".

وأضافت:"في نجوم كبار جداً قدموا أدوار الشر ونجحوا فيها جداً، زي مثلاً عادل أدهم ومحمود المليجي، دول ناس ما يقدروش يقولوا إحنا اتحصرنا في أدوار الشر… بالعكس، كل مرة كانوا بيقدموا الدور بشكل مختلف تمامًا عن المرة اللي قبلها".

أصعب دور شر في مسيرتها

وفي إطار حديثها عن أبرز أدوار الشر التي قدمتها، أشارت الفنانة رحاب الجمل إلى أن أصعب دور شر قدمته في مسيرتها الفنية كان الدور الذي لعبته في مسلسل "البرنس" مع النجم محمد رمضان.

البداية مع الكوميديا

وأوضحت الفنانة رحاب الجمل أنها قدمت أيضاً أدوار كوميدية، وكان أول فنان دعاها لتقديم دور كوميدي، هو الفنان أحمد فهمي في مسلسل "ريح المدام"
وقالت:"كان في قصة كده تلات حلقات بيجيبوا فيها ضيف شرف… هو لما بعتولي القصة دي أنا استغربت جداً، وقلت إيه اللي أنا بقرأه ده؟! ووقتها كلمت الأستاذ كريم العدل وقلت له ايه ده، فقال لي لا… إنت هتعمليها كويس جداً وهتقدري تقدمي دور كوميدي حلو"

وتابعت:"بعد كده كمان أحمد فهمي هو اللي رشحني في فيلم "مستر إكس"، وحقيقي أنا بشكر أحمد فهمي جداً، لأنه شاف حاجة مختلفة عن اللي الناس بتشوفه، وهو أول واحد خلاني أقدم أدوار كوميدية، لأن أنا نفسي ماكنتش متوقعة إني أقدر أروح في الحتة دي، لأن الكوميدي ده شيء مرعب، والضحك صعب جداً، وده بسبب إن المصريين أصلاً دمهم خفيف وبيضحكوا طول الوقت، حتى في المواقف الحزينة بتلاقيهم بيضحكوا، فأصعب حاجة إنك تعرف تضحك واحد أصلاً دمه خفيف وبيضحك على أي حاجة".

أعمال تتمناها في المستقبل

واختتمت الفنانة رحاب الجمل حديثها بالإشارة إلى العمل الذي تتمنى تقديمه خلال الفترة المقبلة، وقالت:"أنا عمري ما فكرت أنا نفسي أقدم إيه… لا دلوقتي ولا في أي مرحلة من حياتي، الحمد لله قدمت أدوار كتير جداً، وأشكال مختلفة، وألوان مختلفة من التمثيل، واعتقد ده علشان أنا دايماً مركزة في المرحلة اللي أنا فيها، وبحاول أقدم فيها أحسن ما عندي، فمش بقعد أفكر بقا أنا نفسي في إيه، أو إيه اللي ناقص"