ياسمين عز: جوزك أحسن من أبو حتب.. حنطيه وخليه بركة البيت
عادت الإعلامية ياسمين عز مرة أخرى لإثارة الجدل بتصريحاتها الأخيرة، بعد أن تناولت حديثًا ساخرًا عن الأجواء الفرعونية، قالت فيه: "بمناسبة الأجواء الفرعونية اللي إحنا فيها دي قومي حنطي جوزك يا مدام، مفيش أنسب من كده أجواء علشان تحنطي حتة الآثار اللي معاكي".
تعليمات "تحنيط" بطريقة كوميدية
وخلال حديثها في برنامجها "كلام الناس"، المُذاع عبر قناة MBC، تابعت ياسمين عز بأسلوبها الساخر، قائلة إن الزوج هو "حتة آثار يونيك" ويجب الحفاظ عليه بخدمة بسيطة داخل المنزل، موضحة بطريقة فكاهية طريقة التحنيط باستخدام الشاش والملح والخل والليمون مع القليل من الزعفران والجبس، مؤكدة أن ذلك سيمنح "الآثار" لونًا رماديًا جميلاً يشبه لون المومياوات الفرعونية.
"مومياء أبو شيماء" تنافس "أبو حتب"
وأشارت الإعلامية المثيرة للجدل إلى أن الزوج بعد التحنيط سيصبح "مومياء أبو شيماء الأول"، مضيفة أن "أبو حتب مش أحسن من جوزك يا مدام، جوزك أبو شيماء أحسن منه مليون مرة".
وتابعت مازحة: "لبسيه فنلته البيضا اللي بيحبها وخليه يتحنط بيها، وقعديه على كرسي في نص الصالون علشان رجله متوجعوش السنين الجاية طويلة".
سخرية من الغيرة بين الجارات في "الأجواء الفرعونية"
ولم تتوقف ياسمين عند هذا الحد، بل واصلت حديثها بروح الدعابة قائلة: "جارتك كليوباترا هتقول عليكي إيه لو محنطهوش؟ هتآكل وشك"، مطالبة السيدات بعدم نسيان "تكميت بوق الزوج" بقطعة شاش ممزوجة بالليمون والخل، قائلة: "دي حاجات بسيطة ومش مكلفة، بس بعد 100 سنة هيدفعولك فلوس علشان يتفرجوا عليه، ويكون دخل ليكي وللولاد".
تشبيه طريف بين كليوباترا و"كيلوبامية"
وفي تعليقها الساخر، تابعت ياسمين عز: "هو يعني أحمس وبطليموس أحسن من جوزك في إيه؟ ده اتجوز كليوباترا، وجوزك اتجوز كيلوبامية، هي مش بالوزن يا مدام، هي بالتقدير"، مضيفة أن الزوج المتحنط سيكون "بركة البيت" ويمكن وضعه "في نص الصالون زي الفازة" لعرضه أمام الضيوف مقابل "هدايا أو فلوس".
وصية ياسمين عز قبل التحنيط: "وقعيه على ورقة البردي"
واختتمت ياسمين عز حديثها بطريقتها المعهودة، قائلة: "بصي لقدام يا مدام، انتي معاكي حتة آثار نادرة يونيك، والآثار مسيرها تتحنّط في يوم من الأيام"، ناصحة السيدات بعدم نسيان "تمضي جوزها على ورقة بردي على بياض قبل التحنيط"، مضيفة: "يكتبلك الشقة والعيال باسمك، محدش ضامن بعد التحنيط ممكن يحصل إيه".