ميدو عادل يبوح بأصعب مخاوفه: الموت مش مرعب.. الفراق هو اللي بيكسر
كشف الفنان ميدو عادل عن أهم مخاوفه في الحياة، وخلال السطور التالية ينقل لكم موقع "وشوشة" أبرز تصريحاته خلال استضافته في برنامج "فايق ورايق" مع الإعلامي إبراهيم فايق، المذاع عبر موقع التواصل الاجتماعي "يوتيوب".
أكد الفنان ميدو عادل أن أكبر مخاوفه هي الموت، لكنه أوضح أنه لا يخاف من الموت على نفسه، بل يخاف من الموت على الأشخاص القريبين منه الذين يخشى فراقهم.
وقال ميدو عادل:"أكتر حاجة بتخوفني في الحياة هي الموت، بس مش بخاف أنا أموت، لا خالص بالعكس، أنا بخاف من الموت على حد من الناس القريبين مني وبحبهم."
خوف من الفراق لا من الرحيل
وأوضح ميدو عادل قائلاً:"أنا لما أموت مش هحس بحاجة، هكون في عالم تاني عادي، لكن حقيقي بترعب من فراق حد عزيز عليا، أنا حتى مش بقدر أفكر في اللحظة."
وأضاف مازحاً:"لو فكرت في لحظة وفاة حد قريب مني أو تخيلتها، هقلب منى الشاذلي وهعيط... طب ليه، لا مش عايز أتخيل أو أفكر في اللحظة دي خالص".
المسؤولية والإنسانية أصعب المحطات في الزواج
واختتم الفنان ميدو عادل حديثه قائلاً:"أنا طول الوقت بقول إن أسوأ حاجة في الجواز هي المسؤولية، يبقى عندك عيال دي مسؤولية صعبة جداً، مش إنسانية أصلاً، حقيقي صعب أوي إنك تفكر إزاي تربي ناس صالحة... طب هو أنا نفسي سوي وصالح علشان أقدر أطلع إنسان تاني صالح؟ صعبة أوي إنك تطلع حد كويس للدنيا ويكون قريب منك جداً، فتخيل بقى إنك تفكر في كده وفي الناس القريبين منك... أبوك أو أمك أو إخواتك أو حتى صحابك، علشان كده بخاف من الموت علشان بخاف من فراق الناس القريبة مني."
وقد أكد ميدو عادل، خلال استضافه سابقة له في بودكاست “إبن كارك" مع الإعلامي كريم خطاب، أن هذا الجيل من الفنانين يمتلك نخبة من المواهب المتميزة، التي لا يستهان بها.
وقال:"نحن نمتلك رصيد ضخم من الفنانين الموهوبين، سواء من الجيل الحالي أو الماضي، إلى جانب الشباب الجديد الذي يتمتع بموهبة قوية، لكنه لم يحصل بعد على الفرصة الكاملة ليقدم نفسه، عندها فقط يمكن الحكم إن كانوا قادرين على تجاوز عبقرية جيل فريد شوقي وأحمد مظهر وأحمد زكي".