مي عز الدين: كنت بمثل وأنا مش في وعيي بعد وفاة والدتي!

كشفت الفنانة مي عز الدين عن كواليس مسلسل قلبي ومفتاحه الذي شارك في السباق الرمضاني لموسم 2025 مع الفنان آسر ياسين والفنان الكبير أشرف عبدالباقي.

و خلال السطور التالية ينقل لكم وشوشة تصريحاتها ،خلال استضافتها في بودكاست "بوب كورنر" و تقدمة الإعلامية هبة عبدالغني، والمطروح على منصة التواصل الاجتماعي "يوتيوب".

وقالت مي عز الدين:" العمل ده كان في فترة حزني على وفاة والدتي، وحقيقي معنديش أي فكرة ومكنتش مركّزة خالص وأنا بمثل، وأستاذ تامر محسن هو اللي كان بيحرّكني طول الوقت ومكنتش في وعيي، ويمكن ده اللي خلّى الناس تحس بالفرق... أي شطارة أو نجاح في الدور كان بسببه وبفضل توفيق من عند ربنا".

فضل تامر محسن

وأضافت:"كل دوري في مسلسل قلبي ومفتاحه حسّيت إنه لولا تامر محسن مكنش هيطلع بالشكل ده اللي عجب الناس. من أهم لأتفه المشاهد؛ لما كنت أتكلم معاه ألاقيه لفت نظري لوجهة نظر تانية خالص، ومكنتش ببقى واخدة المشهد بالشكل ده... اتعلمت منه طريقة مذاكرة جديدة جدًا، وبالتالي كل المشاهد اتغيّر اتجاهها، وعلّمني أفكر من وجهة نظر مختلفة ووسّع أفقي".

الصداقة مع دياب

وفي سياق متصل، تحدثت الفنانة مي عز الدين عن تعاونها مع الفنان آسر ياسين والفنان دياب في هذا العمل، وقالت:"دياب عشرة عمري وصاحبي من سنين، وبحب أهزر معاه. مشكلتي معاه إني عايزة أبطل أضحك في المشهد! وحقيقي كان بيساعدني إننا كنا مع بعض في عمل، وكان بيخرجني بره المود أوي وبيدعمني".

آسر ياسين.. نجم كبير

أما عن آسر ياسين، فأضافت: "نجم كبير واستمتعت بالعمل معاه في قلبي ومفتاحه"

تجربة تجاوزت القلق

وأكدت مي أنها لم تقلق أثناء تصوير العمل أو عرضه، رغم أنه كان جديدًا ومختلفًا، وأرجعت ذلك للحالة النفسية التي كانت تمر بها حينها من حزن على وفاة والدتها.

الإيمان هو الداعم الحقيقي

واختتمت الفنانة مي عز الدين حديثها قائلة:"ربنا هو اللي بيبعت الشغل، وربنا هو اللي بيمشي الدنيا وبينجحني. وإنتِ أصلًا في توقيت معين اللي يساعدك هو التفكير إن لو زعلت هزعل ربنا مني وهكون معترضة على قدر ربنا. هو ده اللي بيخليني أخرج من الحالة وأشتغل. وأنا كان أكبر حب في حياتي كانت أمي طول عمري"