أحمد مالك: فخور بتكريمي في مهرجان الجونة وسط أهلي وناسي
عبّر الفنان أحمد مالك عن سعادته الكبيرة بحصوله على جائزة أفضل ممثل في الدورة الثامنة من مهرجان الجونة السينمائي الدولي، مؤكدًا أن هذا التكريم يحمل طعمًا خاصًا لأنه جاء وسط زملائه وأحبائه من صُنّاع السينما المصرية، الذين يعتبرهم بيته الثاني.
لحظة تقدير وسط الأهل والناسين
قال مالك خلال لقائه مع الإعلامية لميس الحديدي في التغطية الخاصة لختام المهرجان عبر قناة النهار: "سعيد جدًا، وشعور جميل أوي،الواحد بيتعب في شغله ويسعى ويحاول، ولما يحس إن مجهوده اتقدّر، بيكون الإحساس مختلف، خصوصًا وأنا باخد الجائزة وسط أهلي وناسي."
وأضاف: "المهرجان بقى له 8 سنين، والمنافسة فيه قوية جدًا لأن الأفلام جاية من كل أنحاء العالم وواخدة جوائز كبيرة، فكوني أول ممثل مصري أحصل على الجائزة في دوراته السابقة، فده شرف كبير ليا، وأنا فخور إنّي شرفت مصر وشرفت السينما المصرية."
بداية مبكرة وحلم استمر لسنوات
استعاد مالك ذكرياته مع التمثيل قائلاً: "أنا بدأت التمثيل وأنا عندي 11 سنة، وأصحابي بيهزروا معايا ويقولولي: القدير أحمد مالك، هتتكرم عن مجمل أعمالك بدري!".
وأوضح أنه تربى داخل كواليس السينما وكبر أمام الجمهور، مشيرًا إلى أن هذه المهنة لم تكن مجرد عمل بالنسبة له، بل رحلة حياة حقيقية: "أنا جزء أصيل من الصناعة دي، اتعلمت منها كتير جدًا، وعلمتني أكون إنسان أفضل السينما خلتني أشوف الحياة بشكل أعمق، وكل تجربة خدت منها درس جديد."
ورغم نجاحاته المتتالية، شدّد أحمد مالك على أن التعلم المستمر هو سرّ تقدمه،قائلاً: "التعليم هو اللي أنقذني حتى بعد أي نجاح، لازم أنزل على الأرض وأتعلم من جديد مثلاً بعد نجاح مسلسل (أولاد الشمس)، دخلت ورشة تمثيل علشان أتعلم أكتر من ممثلين من مدارس مختلفة."
وأضاف: "اللي بيحب شغله لازم يفضل يتعلم طول الوقت، لأن الشغل دايمًا بيدّي اللي بيخلص له النجاح الحقيقي مش في الجوايز بس، لكن في إنك تطور نفسك وتفضل تجتهد علشان تقدم الأفضل.".
وفي ختام حديثه، وجّه أحمد مالك رسالة مؤثرة إلى الشباب قائلاً:"ما تتوقفوش عن التعلم. النجاح الحقيقي محتاج تعب واستمرارية، والتعليم هو المفتاح اللي هيفتحلكم كل الأبواب كلنا لازم نفضل نجتهد ونحلم، لأن الفن عمره ما بيكافئ غير اللي بيحبّه بصدق."