خالد الحلفاوي لـ”وشوشة”: ابتعدت عن الكوميديا في مسلسل "اتنين غيرنا"

أعرب المخرج خالد الحلفاوي عن سعادته بتعاونه الجديد مع شركة “ميديا هب” في مسلسل “اتنين غيرنا”، الذي من المقرر أن يتم عرضه  في 15 حلقة خلال موسم رمضان المقبل.

وقال خالد الحلفاوي في تصريح عبر "وشوشة": "من زمان نفسي أشتغل مع ميديا هب، وكنا بنحاول نتعاون أكتر من مرة لكن الظروف مكنتش بتسمح، خصوصًا فترة كامل العدد اللي كنت مرتبط بأجزائه أول ما خلصت، كان من أولوياتي إني أشتغل معاهم، وطبعًا بشرط وجود نص قوي".

وأضاف خالد الحلفاوي قائلاً: "رنا بثق فيها جدًا.. بقالي 3 سنين شغال معاها، ومجرد ما حكيتلي فكرة المسلسل قبل حتى كتابة النص أنا وافقت فورًا، لأني عارف قد إيه هي محترفة وبتكتب إزاي”.

ابتعاد  خالد الحلفاوي عن الكوميديا

وتابع خالد الحلفاوي قائلاً: "أكتر حاجة شدتني للمسلسل هو كم المشاعر اللي فيه، وإنه بيناقش قضايا مهمة بطريقة غير مباشرة ومن خلال الدراما وحبيت كمان أبعد شوية عن المنطقة الكوميدية اللي اتعودت عليها".

أبطال مسلسل اتنين غيرنا

وكشف خالد الحلفاوي عن الأبطال قائلاً: المؤكد حتى الآن هم دينا الشربيني وآسر ياسين، وفي أسماء تانية جاري التعاقد معاها".

مواقع التصوير

واختتم خالد الحلفاوي حديثه قائلاً: "المعاينات لسه مخلصتش، لكن الغالب إن التصوير هيكون بالكامل داخل مصر، وممكن يكون فيه مشاهد صيفية حسب الجدول. التعاون بيني وبين رنا  أبو الريش مثمر جدًا زي ما الناس شافت في كامل العدد.. إحنا على طول على نفس الموجة".