عمرو أديب: السيسي أمر ببناء مخازن جديدة لحفظ الآثار بمنطقة آمنة
قال الإعلامي الكبير عمرو أديب، إن ما يقوم به الرئيس عبد الفتاح السيسي في ملف الآثار المصرية هو عمل وطني عظيم لا يهدف فقط إلى حفظ الأموال أو المواد الأثرية، بل إلى صون تاريخ مصر وحماية تراثها الإنساني للأجيال القادمة.
وكشف أديب خلال تقديمه حلقة جديدة من برنامجه "الحكاية" المذاع عبر شاشة "MBC مصر"، أن وزير السياحة والآثار أرسل له رسالة خاصة خلال البرنامج قال فيها: "مقدرتش أكون معاك في البرنامج، وأحب أضيف أن الرئيس وجّه الأسبوع الماضي أثناء لقائي بسيادته ببناء مخزن آثار جديد على أعلى مستوى في منطقة آمنة، وبأحدث التقنيات. تحياتي."
وأضاف أديب معلقًا على الرسالة: "اللي بيعمله الرئيس مش خطوة عادية، إحنا مش بنتكلم عن بناء مبنى أو منشأة، إحنا بنتكلم عن حفظ التاريخ المصري. الرئيس مش بيحافظ على فلوس أو حجارة، ده بيحافظ على هوية، على ذاكرة أمة. لما توصل دولة لمرحلة إنها محتاجة تبني مخازن حديثة للآثار بدل المتاحف الصغيرة، ده معناه إن عندك كنوز مش قادرة تستوعبها المتاحف الموجودة، سواء المتحف المصري بالتحرير أو حتى المتحف الكبير."
وأشار أديب إلى أن توجيه الرئيس بإنشاء مخازن متطورة للآثار خطوة لا يناقشها أحد، لأنها تمثل نقلة نوعية في حماية التراث المصري، موضحًا أن هذه المخازن ستكون مؤمنة وفق أعلى المعايير العالمية، وتضمن سلامة القطع الأثرية النادرة التي لا تُقدر بثمن.
وتابع قائلاً: "اللي يشوف حادثة ضياع الأسوِرة من المتحف، يعرف قد إيه كلام الرئيس مهم جدًا. لو في شخص قدر ياخد حاجة ويحطها في صدره ويخرج، فإيه اللي خرج قبل كده؟ وكمية التاريخ اللي ضاع من غير ما نحس؟! المسألة مش بسيطة، دي مش قضية إدارية، دي قضية وطنية وإنسانية."
وأكد أديب أن ما قاله الرئيس عن المخازن الأثرية أهم من المتاحف نفسها، لأن الهدف ليس فقط العرض أو التجميل، بل الحفاظ على التراث ودراسته وتوثيقه وتوريثه للأجيال القادمة.
وأضاف: "مصر تاريخها ضخم جدًا، والمتحف القديم في التحرير لا يكفي، وحتى المتحف الكبير رغم عظمته مش هيقدر يشيل كل الآثار. ده تاريخ آلاف السنين، ومفيش دولة في العالم عندها الكم ده من الكنوز."
واختتم أديب حديثه قائلًا: "يا جماعة، المسألة مش مسألة مال، المسألة مسألة وعي وتاريخ. لما تشوف دول بتعرض عمودين وحجَر على تبة، وبيجيلها 35 مليون سائح، لازم تعرف إن إحنا أولى وأجدر. كل سنتيمتر في أرض مصر فيه حضارة، وكل قطعة حجر فيها قصة. اللي بيعمله الرئيس دلوقتي هو استثمار في هوية مصر قبل أي شيء آخر."