"الستات ما يعرفوش يكدبوا" يشيد بـ"تريند اتقدم خطوة": يجسد تضحيات الأهل
سلطت الإعلامية منى عبد الغني الضوء على “تريند” جديد على مواقع التواصل الاجتماعي يحمل اسم “اتقدم خطوة”، واصفة إياه بأنه أحد أبرز الظواهر الإيجابية على السوشيال ميديا خلال الفترة الأخيرة.
وأشارت إلى أن هذا “التريند” يحمل رسائل إنسانية عميقة تكشف حجم تضحيات الأهل في سبيل مستقبل أبنائهم.
وخلال حلقتها في برنامج “الستات مايعرفوش يكدبوا” على قناة “CBC”، قالت عبد الغني: “التريند ده بيعكس قد إيه الأهل ضحوا وتعبوا عشان أولادهم يكونوا أفضل، وكل إجابة صحيحة في اللعبة بتقدّم الأب أو الابن خطوة للأمام، وده معناه تقدير الجيل الجديد لتضحيات الجيل السابق”.
وأضافت الإعلامية أن هذا "التريند" يختصر الفجوة بين الأجيال، موضحة: “الأب كان بيعيش طفولة مليانة مسؤوليات، وما كانش عنده رفاهية زي اللي بيشوفها أولاده دلوقتي، وعلشان كده الأطفال دلوقتي متقدمين خطوات عن أهلهم، والفضل كله للأهل اللي تعبوا وضحوا”.
من جهتها، أعربت الإعلامية إيمان عز الدين عن إعجابها بالبعد الإنساني للفكرة، واستذكرت موقفًا شخصيًا جمعها بوالدها الراحل: “التريند فكرني بحوار قديم بيني وبين والدي، لما كنت زعلانة منه وقال لي: تربيتك غير تربيتنا، والبيت اللي أنا اتربيت فيه غير بيتك، ولما بقيت أم فهمت كلامه أكتر”.
وقالت عز الدين: “الأجيال اللي قبلنا كانت بتحرم نفسها عشان توفر لنا، دلوقتي بنشوف أطفال عندهم غرف خاصة، ألعاب، وسفر، وحياة مريحة، بينما إحنا كنا بنركب المواصلات ونتعب، مهم جدًا إن الأولاد يعرفوا ويقدروا ده”.
وأكدت منى عبد الغني على ضرورة الاعتراف بالجميل للأهل مهما كانت أساليبهم صارمة أحيانًا في التربية، قائلة: “المعروف اللي عمله أبوك وأمك لا يُنسى، هم كانوا بيتأخروا ويضحوا عشان يبنوا مستقبلك، وده الاستثمار الحقيقي”.
وأضافت عز الدين قصة مؤثرة لطالبة طب شكرت والدها النجار على دعمه لمصاريف تعليمها: "الأب ده ضحى من نفسه عشان يوفر لها تعليمها، وده أعظم تقدير ممكن يُقال لأي أب".