يوسف عمر عن "شباب امرأة": الفلاح مش لازم يبقى صورة نمطية
كشف الفنان يوسف عمر كواليس تجسيده لشخصية "إمام" في مسلسل "شباب امرأة"، مشيرًا إلى أن طريقة حديثه في العمل كانت مقصودة لتقديم صورة جديدة عن الفلاح المصري، بعيدًا عن النمطية. وقال: "قصدنا نبين إن الفلاح بيتكلم عادي، بيلبس عادي، وعادي يكون عنده فيسبوك وإنستجرام، لأن ده واقع حقيقي في مجتمعنا دلوقتي."
وأوضح يوسف عمر، خلال استضافته في برنامج "It’s Show Time" المذاع عبر قناة الحياة، أن الفريق عمل على دراسة تطور الشخصية بدقة من أول حلقة وحتى الأخيرة. وقال: "قعدنا نذاكر تاريخ الشخصية والتطور اللي بيحصل لها، وده كان بالنسبالي شيء مرعب ومش بسيط، لأنه محتاج مجهود نفسي وعقلي كبير."
وأشار إلى أن المسلسل يُشبه الرواية الأصلية التي يحمل نفس اسمها، مؤكدًا أن القصة حقيقية إلى حد بعيد. وردًا على المقارنات التي أثيرت منذ عرض العمل مع الفيلم الشهير "شباب امرأة"، أوضح قائلاً: "المقارنة طبيعية ومتوقعة، لكن بطلب من الناس يشوفوا المسلسل بعين دلوقتي، مش بعين فيلم قديم، لأننا بنقدم رواية مش الفيلم، وشخصياتنا مختلفة عن شكري سرحان وتحية كاريوكا."
وأضاف أن الشخصيات في العمل تم تقديمها بزاوية جديدة تتماشى مع روح الرواية لا الفيلم، موضحًا: "إحنا مش بنقدم شكري سرحان وتحية كاريوكا، إحنا بنقدم إمام وشفاعات زي ما كانوا في الرواية، وبالتالي فيه اختلاف كبير في التفاصيل والطرح."
وتحدث يوسف عمر عن كواليس عمله مع الفنانة غادة عبد الرازق، قائلاً: "أستاذة غادة مريحة جدًا في الشغل، واتعلمت منها إزاي أساعد الممثل اللي قدامي علشان يطلع أفضل ما عنده. كانت بتحاول دايمًا تساعد كل الناس علشان العمل يطلع في أفضل صورة."
واختتم حديثه بالتأكيد على أن الشخصية التي قدمها كانت تحديًا كبيرًا بالنسبة له، لأنها بعيدة تمامًا عن حياته الواقعية. وقال: "الدور مختلف عني تمامًا، وعمري ما عملت شخصية زيه قبل كده، وده اللي خلاني متحمس جدًا، وعاوز أجتهد علشان أقدمه بأفضل شكل ممكن."