إنجي علي تودّع لطفي لبيب: "ماكانش بس ممثل.. ده كان صاحب وأخ كبير"
نعت الإعلامية إنجي علي الفنان القدير الراحل لطفي لبيب، الذي وافته المنية وسط حالة من الحزن العميق في الوسط الفني والجمهور، عبّرت إنجي عن فقدانها لشخص وصفته بأنه "كان بيحسسك إنك من عيلته حتى لو شُفته مرة واحدة".
وتابعت خلال برنامجها "أسرار النجوم" المذاع عبر إذاعة "نجوم إف أم": "لطفي لبيب مش مجرد فنان، ده إنسان عاش ببساطة، وعلّم أجيال يعني إيه خفة دم من غير تصنّع، ويعني إيه تمثيل يوصل للقلب من أول مشهد". وأضافت: "اللي قرّب منه عرف إنه صاحب قبل ما يكون نجم.. كان ضهر وسند وصاحب كلمة حلوة لكل اللي حواليه".
وتحدثت إنجي عن الجانب الوطني من حياة الفنان الراحل، مشيرة إلى أنه لم يكن بطلًا على الشاشة فقط، بل شارك في حرب أكتوبر ضمن صفوف القوات المسلحة، وقالت: "كان بيحكي عن الجبهة بنفس الهدوء اللي كان بيحكي بيه عن الكواليس.. وده شيء مش ممكن يتنسى".
واختتمت حديثها قائلة: "أنا فخورة إني عرفته، وفخورة إنه عاش بينا.. لطفي لبيب ماكانش ضيف على حياتنا، ده كان جزء منها.. ربنا يرحمه ويصبر كل اللي حبوه، واللي كانوا بيشوفوا نفسهم في ضحكته الطيبة".