هبة مجدي تفتح قلبها لـ”وشوشة” بعد نجاح فيلم "استنساخ" ( حوار)
دائماً ما تحرص على الظهور بأدوار مميزة تضيف لها وترضي جمهورها، وتعرف باختياراتها الدقيقة وقدرتها على تقديم شخصيات متنوعة تمس الواقع وتلامس المشاعر، إنها الفنانة هبة مجدي، التي أثبتت نفسها كواحدة من أبرز نجمات جيلها على الساحة الفنية.
وفي أحدث مشاركاتها السينمائية، تعود هبة مجدي لتلفت الأنظار من جديد من خلال فيلم "استنساخ"، الذي خضت به تجربة مختلفة تماماً عن أعمالها السابقة، حيث ناقش الفيلم قضية الذكاء الاصطناعي وعلاقته بالعالم الرقمي والافتراضي، وهو ما اعتبرته خطوة جريئة تحمل رسالة مهمة في زمن أصبحت فيه التكنولوجيا تتحكم في تفاصيل الحياة اليومية.
ومن خلال حوار خاص لـ"وشوشة"، كشفت الفنانة هبة مجدي عن كواليس مشاركتها في فيلم "استنساخ"، وتحدثت عن تفاصيل التحضير لشخصية "مريم"، ورؤيتها لموضوع الذكاء الاصطناعي.
إليكم نص الحوار:
ما الذي جذبكِ تحديدًا في سيناريو “استنساخ” وجعلكِ تقررين خوض هذه التجربة؟ وهل شعرتِ أنه يحمل رسالة معينة أردتي توصيلها للجمهور؟
أنه هو مختلف وبيتكلم على ال Ai والذكاء الاصطناعي قبل ماكان يظهر أوي الذكاء الاصطناعي لأن الكلام دة كان من حوالي سنة ونص فا أتشديت أوي للسيناريو اتشديت إن هي شخصية وجوا الكاميرا اللي هو بيلبسها شخصية تانية هي هي نفس البنت بس مستنسخة فدة شدني أوي إن احنا داخلين على عالم مخيف اوي مش عارفين اخرته ايه لازم ناخد بالنا حسيت إن هو ليه رسالة مهمة الفيلم وشدني إن أنا بعمل الكاركتارين بس كاركتر حقيقي وكاركتر مستنسخ مش حقيقي إفتراضي بيجذبوا العالم ممكن يكون غامض ومش كويس وعايز ياخد منه مش يديله فالحاجات دي ساعدتني جداً إن أنا أتحمس كمان فكرة إن عبد الرحمن هو المخرج وهو المؤلف وهو اللي بينتج يعني أنا تعاطفت مع الفكرة جداً وحسيت إن أنا عايزة يعني أشتغل معاه لأن هو شاب مجتهد جداً وفعلاً شاطر أوي وطلع رؤية حلوة ومختلفة فاعجبتني دماغه وحسيت إن أنا عايزة أشتغل معاه واستفيد منه وكان نفسي أشتغل برضه مع سامح أوي فالحمد لله ربنا وفقنا في العمل دة وكنت مبسوطة جداً إن أنا بشتغل معاه لأن هو ممثل برضه شاطر أوي أوي وموهوب جداً وعمل دور مختلف عن الحاجات اللي هو عملها قبل كدة
تجسدين في الفيلم شخصية “مريم” المتأثرة بالسوشيال ميديا.. كيف تعاملتِ مع هذه التركيبة النفسية المعقدة؟ وهل استلهمتِ من نماذج حقيقية في الواقع؟
لا هي مريم مش متأثرة بالسوشيال ميديا مريم في الفيلم هو موظفة بتشتغل في الشركة اللي بيديرها سامح حسين فهو بيحبها من غير مايقولها ويعبرلها لأن هي ست متجوزة وهما في زمن غير الزمن اللي احنا عايشين فيه زمن متطور زيادة وبيخلينا نشوف حاجات افتراضية من خلال كاميرا من خلال حاجة بتتلبس كدة زي الألعاب يعني بس بيخلينا البني أدمين اللي احنا منقدرش نواجههم في المجتمع بنواجههم من خلال العالم الإفتراضي اللي هو بيعمله فهو عمل عالم إفتراضي يشوف فيه مريم اللي بيحبها مش قادر يعبرلها عن حبه ليها فالموضوع بيخش في سكة إن هي بتستدرجه لحاجات ليها علاقة بشغله مش بس بتشبعله رغبات مريم اللي بيحبها فأكتشف إن العالم دة عالم مخيف وعالم مظلم ومش حلو وعالم ممكن ياخد منه ارضه ممكن يعني يخليه يتصرف تصرفات لأن هو متجوز وعنده طفل بدأ يبعد عنهم وحاجات كدة فهو إجتماعي على عاطفي يعني في كوليكشن حاجات للتكنولوجيا وللقصة دي إناحنا نخلي بالنا يعني
هل ترى هبة مجدي أن السوشيال ميديا في حياتنا الواقعية أصبحت “نسخة مستنسخة” من الحقيقة؟ وهل أثرت هذه الفكرة في نظرتك الشخصية لمواقع التواصل؟
لا الجزء بتاع مريم الإفتراضي مكنش له اي نسخة حقيقية في الواقع خالص بالعكس يعني هي مريم الحقيقية الموظفة اللي في الفيلم دي ليها سكة وليها شخصيتها العادية بنت عادية ومجتهدة وبتشتغل وبتحب شغلها بتحاول تظبط بين شغلها وبين جوزها اللي برضه ليه احتياجاته لكن مريم الإفتراضية الشخصية بقا المختلفة دي اللي شجعتني وخلتني يعني أعمل الفيلم لا مستلهمتهاش من أي نماذج أخرى خالص لأن هي مش واقعية بالعكس هي كانت قرب للخيال شوية مع تفكيري مع كلامي شوية مع المخرج كنا عايشين في نقاشات كتير جداً انا والمخرج وسامح فكانت من وحي خيالي أنا بتخيلها عاملة ازاي عاملة زي ال Ai كدة
هل استعنتي بمدرب تمثيل أو متخصص نفسي لفهم وتحليل مشاعر “مريم”، خاصةً وأنها شخصية غير تقليدية؟
لا مستعنتش بمدرب تمثيل بس انا اتناقشت كتير مع المخرج لأن هو اكتر واحد وأهم واحد هيقدر يفيدني في القصة دي لأن هو كاتب الفكرة فهو كان أكتر واحد يقدر يشرحلي الموضوع ويوصلهولي على طول بشكل مبسط
الفيلم يتناول قضايا مثل الذكاء الاصطناعي وتأثيره على الإنسان.. إلى أي مدى تؤمنين بأن الذكاء الاصطناعي يهدد “الروح البشرية”؟
الذكاء الاصطناعي انا يعني مش متبشرة به خير مش عارفة ليه لازم ناخد احتياطاتنا وناخد بالنا كويس قوي من تعاملاتنا مع السوشيال ميديا عامة وكمان الحاجات الذكية اوي ال Ai والشات جي بي تي والحاجات دي علشان هي تدينا معلومات لكن ما تاخدش مننا معلومات واحنا ما نصدرهاش اوي لاطفالنا ولعيالنا الصغيرين علشان هم لسه مادة خام ممكن هما يأثروا جامد على الاطفال وعقولهم وتفكيرهم زي الالعاب اللي فيها نوع من الذكاء الاصطناعي العاب مرعبة يعني لازم ناخد بالنا كويس جدا من القصة دي يعني عشان الموضوع ميشدناش لحاجات مش كويسة تغير من اخلاقنا وتغير من ثقافتنا الاجتماعية وتغير كمان من كيميا المخ بتاعتنا يعني التعرض للشاشات والحاجات دي مش كويسة خالص يعني
ما أصعب مشهد واجهكِ خلال التصوير؟
بصي يعني ما فيش مشهد معين اوي كان صعب واجهني في ليه بقى لان كل المشاهد مريم الافتراضية كانت بالنسبة لي شدة كده لازم ابقى مشدودة وابقى واخدة بالي من كل جملة بقولها فدي كانت صعوبتها انا بقول ايه وبقوله ازاي علشان هو مش في العادي هو مش في الطبيعي وفي نفس الوقت هي بتحاول انها تضحك على حد فلما يعني ذكاء اصطناعي يضحك حاجة افتراضية تضحك على بني ادم البني ادم برضو انسان ذكي وهو اللي اخترع الحاجة دي لازم تكون واخدة بالها كويس اوي ولازم ابقى واخدة بالي من كل جملة بقولها وبقولها ازاي واحساسها طالع ازاي فهي دي كانت صعوبتها
اللي حسيته كمان ان مريم الافتراضية متلونة يعني بتظهر له في اماكن مختلفة في الاماكن اللي هو بيفكر فيها مش ساعات كده احنا بنقعد نفكر في حاجة بتطلع لنا على الموبايل بتظهر لنا لمجرد ان احنا بنفكر فيها هو بقى لعب على الشكل ده في مشاهد البطل مع مريم الافتراضية كانت بتطلع له في اماكن مختلفة اماكن هو بيفكر فيها وبيحبها بتفكروا بيها فدي برضو يعني صعوبة إن الشخصية دي تبقى متلونة وتبقى متغيرة في طريقتها يعني مرة تبقى في غرفة النوم بشكل كلاسيكي قوي مرة تبقى بشكل عربي قوي ويعني الشكل العربي القديم اللي رايح لسكة المغاربة والطراز العربي مرة تطلع له في فصل في المدرسة وتفكره بإيام ما هو كان شاطر كده يعني فدي كلها حاجات برضو حلوة قوي وساعدتني ان انا ابقى متحمسة جداً للشخصية
ماهي الرسالة التي تحبي ان توجههيها للفنان سامح حسين ؟
اوجهله رسالة إن أنا كنت سعيدة جداً إني اشتغلت معاه وانبسطت أوي هو إنسان محترم أوي ومجتهد جداً صبور أوي وبيتحمل تعب التصوير وعدد الساعات ودايماً مبيحبش يعمل أي توترات بالعكس بيمتص كل التوترات في الليوكيشين فحقيقي استفدت جداً من اخلاقه وطاقته الإيجابية اللي كانت في التصوير وطبعا أحب جداً إن نكررها تاني إن شاء الله
هل يوجد أعمال جديدة في الفترة القادمة؟
ما فيش هو مسلسل حرب الجبالي بيتذاع دلوقتي أوف سيزون فهو ده اللي انا يعني كنت منتظزراه الحقيقة والحمد لله ان هو نزل وبيتذاع والحمد لله على ردود افعال الناس مبسوطة جدا بالمسلسل بتابعه أوي أوي فده بسطني جدا لان مسلسل شعبي مختلف مسلسل مصري اصيل يعني وفي نماذج وفي دراما احنا مفتقدينها بقى لنا كتير دور برضو انساني أوي ومختلف ثريا دي انسانية اوي اوي فانا كان بقى لي كتير ما عملتش حاجة طيبة وانسانية ولها طاقة ايجابية وبتحاول يعني تساعد الناس وتساعد ابوها المريض يعني في دراما حلوة أوي أوي للمسلسل ده وكمان الكاست اللي اتشرفت اني اشتغلت معه كاست رائع وأساتذة كبار فده انا مبسوطة اوي ان هو بينزل دلوقتي والناس متحمسة وبتتفرج عليه.