سينتيا خليفة: “ابن النادي” بداية جديدة خارج قالب البنت الحلوة
عبّرت الفنانة سينتيا خليفة عن سعادتها الكبيرة بالمشاركة في فيلم “ابن النادي”، مؤكدة أن الدور الذي تقدمه مختلف عن كل ما قدمته سابقًا.
وقالت سينتيا في تصريح خاص لـ”وشوشة”:
“الدور مختلف تمامًا عن أي حاجة عملتها قبل كده، وده اللي شجعني أوافق عليه. بقالي تقريبًا سنتين بصوّر برا مصر، لكن رغم كده كنت برفض أعمال كتير لأنها دايمًا بتحطني في قالب البنت اللبنانية الحلوة، اللي وجودها قائم على الشكل مش الأداء.. وأنا مش عايزة أكون محصورة في القالب ده”.
وأضافت:
“أنا كممثلة باخد شغلي بجدية، وعندي حاجات مختلفة نفسي أقدمها. رفضت أعمال كبيرة ومع أسماء مهمة، بس كانت بتحطني في نفس التايب، وده كان تحدي بالنسبالي إن الناس تشوفني كممثلة عندها أدوات ومشروع فني حقيقي”.
وعن طبيعة الدور، أوضحت:
“في ابن النادي بقدم شخصية كوميدية جدًا، مبنية على خفة دمها مش على شكلها، وده كان مهم جدًا بالنسبالي. حبيت إن الكوميديا طالعة من الشخصية نفسها”.
وأشادت سينتيا بفريق العمل قائلة:
“سعيدة جدًا بالشغل مع أحمد فهمي، في بينا كيميا حلوة من أول يوم. هو قبل ما يكون فنان موهوب، إنسان بسيط، متواضع، حقيقي، وبيحب الحيوانات، ودي حاجة أنا بحبها جدًا. كمان هو فنان شامل بيكتب وبيمثل وأفكاره دايمًا مختلفة”.
كما عبّرت عن تقديرها للتعاون مع المنتج طارق الجنايني، قائلة:
“هو من أكتر المنتجين اللي بشوف إنهم بيعملوا أعمال ترفع الراس، وحابة جدًا إن التعاون بينا يتكرر في أعمال جاية”.
قصة مسلسل “ابن النادي”:
تدور أحداث المسلسل، المقرر عرضه على إحدى المنصات، في إطار كوميدي اجتماعي، حول شاب يرث ناديًا رياضيًا ويجد نفسه مسؤولًا عن إدارته وسط تحديات يومية، تتعلق بأنشطة النادي، اللاعبين، التغطية الإعلامية، والمشكلات الإدارية التي تواجه الأندية الشعبية.
أبطال مسلسل “ابن النادي”:
المسلسل من بطولة: أحمد فهمي، حاتم صلاح، أحمد عبد الحميد، سيد رجب، جيهان الشماشرجي، محمد لطفي، رشدي الشامي.
من تأليف: مهاب طارق وإخراج: كريم سعد