صلاح عبدالله: نفسي أمثل مع كريم عبدالعزيز وأحمد حلمي.. واتنصب عليا من شخص أعرفه
كشف الفنان صلاح عبدالله عن رغبته في التمثيل مع النجمين كريم عبدالعزيز وأحمد حلمي، قائلاً: "نفسي أمثل معاهم، وحظي قليل لأني ما اشتغلتش معاهم حتى وهما لسه صغيرين".
وأضاف خلال لقائه ببرنامج"حبر سري": "في نجوم كتير أصبحوا سوبر ستار وميجا ستار، وسبق وشاركتهم في أعمال وهم لسه شباب".
وتابع ضاحكًا: "دلوقتي هيبقى في مشكلة بعد التصريح ده، لأني لو جاتلي عروض تمثيل معاهم هاعتذر! عمري ما قلت قبل كده إني أتمنى أمثل مع حد. أنا بحبهم جدًا، لكن وارد إنهم ميحبونيش".
كما تحدث صلاح عبدالله عن تعرضه لمواقف صعبة في حياته، مؤكدًا أنه تعرض للنصب من شخص لم يكن يتوقعه، وقال: "أكتر ناس خدعوني كانوا ناس مش معروفين، وفي موقف معين نصب عليا حد ما توقعتش شخصيته بالشكل ده، رغم إن أهلي كانوا دايمًا بينبهوني إني مبقولش كل حاجة".
وأضاف: "عدت سنين، وفجأة قريت خبر وفاته، وقضيت ليلة ربنا وحده اللي يعلم بيها. كنت ساكن في شقة، وفتحت شباك أوضتي وكلمت ربنا، بحاول أقنعه إنه مكنش نصب عليا".
واختتم: "كنت بحاول أقوله إني فهمت غلط، وغلّطت نفسي، ومن ساعتها حسيت إن ربنا استجاب لدعائي، وهو مات صغير وفي دار الحق، وربنا أعلم بالنوايا".