صلاح عبدالله: النقاب مش من قناعتي.. وبرامج المقالب مش ليا دلوقتي

عرّف الفنان صلاح عبدالله نفسه بأسلوب شعري قائلاً: "مُمثّل في البطاقة وفي الباسبور، أخرج من دور أدخل في دور، كلّما قال لي عقلي كفاية ارتاح، يردّ قلبي: لسه ماجاش الدور، حاجات كتير حبيتها وعملتها، وبعد شوية نسيتها وأهملتها، وعمري ما طلعت الأول في حاجة، ومفيش حاجة بدأتها وكملتها إلا التمثيل".

وخلال لقائه في برنامج "حبر سري"، تحدث صلاح عبدالله عن رأيه في النقاب، مؤكدًا رفضه التام للفكرة سواء له أو لبناته، قائلاً: "يعني إيه مقدرش أميز راجل من ست؟ ولا آخد بالي مين اللي دخل بيتي؟ الحاجات دي بتعمل حساسية ومشاكل، وناس بتشتم، بس إحنا اتعودنا".

وأضاف: "دي قناعتي، النقاب اللي هو كتلة السواد ده مش شايفه إسلامي، والله أعلم. ولو بنتي قالت لي عايزة تتنقّب، هتبقى حاجة صعبة وهرفض، وهحاول أقنعها، لكن لو أصرت مش همنعها، ممكن تتحجب، وأنا مربّي بناتي على الاحتشام والحرية، مش الفرض، أنا مؤمن بالحرية".

وعن فكرة المشاركة في برامج المقالب، علّق قائلاً: "أنا شاركت زمان في بعض برامج المقالب وكانت بسيطة وخفيفة، لكن دلوقتي لأ، خلاص، في برامج حاولوا معايا واعتذرت لهم بكل حب وأدب.

وتابع: "رامز ده ابني، وهي سبوبة حلوة، بس مقدرش ومينفعش أشارك فيها، كنت أتمنى، بس مقدّر إن ده مش مكاني دلوقتي".