غنوة محمد الموجي لـ"وشوشة": العندليب كان بيعاقبنا على الدرجات
كشفت غنوة محمد الموجي، ابنة الملحن الكبير محمد الموجي، عن طبيعة العلاقة العائلية القوية التي جمعتها مع الفنان الراحل عبد الحليم حافظ، مشيرة إلى مواقف إنسانية جمعتهم في الطفولة ظلت محفورة في ذاكرتها حتى اليوم.
غنوة الموجي: العندليب كان بيعاقبنا على الدرجات
وقالت غنوة في تصريح خاص لـ" وشوشة " : “كانت علاقتنا عائلية جدًا بعبد الحليم، وكنت أنا وأختي أنغام دايمًا بنظهر في حفلاته، نقدمله الورد وكان هو اللي بيطلب مننا دا، لأنه كان بيتفاءل بينا وكان دايمًا يقول: كل ما بتقدمولي ورد في أغنية جديدة الأغنية دي بتنجح”.
وتابعت متذكرة موقفًا آخر: “في مرة كنا في إجازة الصيف، وكلمنى عبد الحليم في التليفون وسألنا: جبتوا كام؟ فلما قلناله الدرجات، قال لا الدرجات مش كويسة ومش عاجباني وعلى طول قال: مفيش مصيف السنة دي، وكلكم هتقعدوا تذاكروا في الصيف، دا قرار”.
واستكملت قائلة: “حاولنا نعترض وقلناله لأ إحنا عايزين نروح المصيف، لكنه صمم وزعق بصوته العالي، حسينا إن مفيش فايدة، فرحنا لوالدي محمد الموجي نشتكيله فكان رده: لا، اسمعوا كلامه وقعدوا ذاكروا، درجاتكم مش حلوة بابا كان بيقدره جدًا”.
وأضافت: “عبد الحليم حافظ كان حاضر معنا في كل أعياد الميلاد، ولو مقدرش يحضر، كان بيبعتلي هدية، وهداياه دايمًا كانت قيمة علاقتنا كانت قريبة جدًا”.
