أحمد عبد الحميد لـ"وشوشة": شخصية "بوجي" الأقرب لقلبي.. وبحب أقدم أدوار مختلفة
كشف الفنان أحمد عبد الحميد عن كواليس مشاركته في مسلسل "ظروف غامضة"، مؤكداً أن أكثر ما جذبه للعمل هو روح الفريق والكاست وفكرة المسلسل المميزة، قائلًا: "اللي شدني في ظروف غامضة كان الكاست والكرو، بصراحة الناس كلها محترمة واشتغلت معاهم قبل كده أو كنت حابب أشتغل معاهم، وكمان الفكرة بتاعة المسلسل مختلفة جداً ومش مألوفة، وده اللي بيدور عليه أي ممثل عايز يعمل حاجة جديدة فعلاً".
وأضاف أحمد عبد الحميد في تصريح خاص لـ"وشوشة": "بدأنا التصوير من فترة قريبة والكواليس كانت ممتعة جدًا، وفيها طاقة حلوة بينا وده انعكس على الشغل وأنا بحاول دايمًا أشتغل على التنوع، ومش بحصر نفسي في نوع معين من الأدوار، ودي حاجة بحبها جدًا".
وتحدث عبد الحميد عن أبرز الشخصيات التي قدمها وتركت بصمة في مشواره، وعلى رأسها شخصية "الشيخ بوجي" في مسلسل "ظلم المصطبة"، موضحًا: "الشخصية دي أثرت فيا جدًا بشكل إيجابي، لأن الناس شافت تطورها وده كان باين في ردود الأفعال، فهتفضل دايمًا من أقرب الشخصيات لقلبي".
وتابع: "مثلاً شحاتة في "سيكو سيكو" كان مختلف خالص عن بوجي، وكمان شخصية وليد في فيلم "نجوم الساحل" كانت خفيفة وقريبة للناس، وكل شخصية اشتغلت عليها بطريقتها الخاصة".
واختتم قائلًا: "أنا بحب أجرب كل الأنماط، بحب أقدّم شخصيات متنوعة علشان أطوّر من نفسي، وأهم حاجة عندي إن الجمهور يصدقني ويحس إن الشخصية حقيقية مش تمثيل".