فتحي عبدالوهاب: مش بفرح بشغلي وأنا بعمله!
كشف الفنان فتحي عبد الوهاب عن أنه لا يحب مشاهدة أعماله الفنية أثناء تصويرها، موضحًا أن ذلك يرجع لشعوره بعدم الرضا عن أدائه في اللحظة نفسها.
وقال فتحي عبد الوهاب، خلال حديثه في برنامج "كلمة أخيرة" المذاع على قناة ON: "أنا عمومًا مابفرحش على شغلي أثناء ما بشتغل، بحس إني وحش أوي وسيئ ورديء، ومابرتاحش أتفرج عليه غير بعد ما يعدي وقت، علشان أقدر أشوفه بعين تانية".
وأضاف: "ده ليه تفسير عندي، إن بيبقى لسه في جوايا مخزون مشاعر ناحية الشخصية، ولما باتفرج بحس إن اللي طلع قدام الكاميرا أقل بكتير من اللي كان جوايا، وساعتها بافترض إن حصلت مشكلة في التعبير أو الأداء، وده بيعملي أزمة لو اتفرجت وأنا لسه شغال".
وتحدث عن كواليس مسلسل ظلم المصطبة، مؤكدًا أن التجربة كانت صادقة إلى حد كبير، وقال: "المسلسل كان حقيقي جدًا، ولازم أشكر وأقدّر اللي عمله المخرج هاني خليفة، لأنه ساهم في صنع عمل قوي ومؤثر".
وفيما يتعلق برحيل هاني خليفة عن العمل قبل انتهائه، أوضح عبد الوهاب أن "العلاقة بين الإنتاج والإخراج دايمًا حساسة، وفيها توترات تاريخية. وفي النهاية، اللي بيحصل في الكواليس أو في الأماكن المغلقة، احنا كممثلين غالبًا منعرفش تفاصيله".