ألحان المهدي: بدأت التمثيل وأنا عندي 6 سنين!
كشفت الفنانة ألحان المهدي عن تفاصيل مؤثرة من نشأتها الفنية، مؤكدة أنها تربت في بيت ينبض بالموسيقى، مما شكل شخصيتها الفنية منذ الطفولة.
وقالت ألحان المهدي، خلال حديثها في برنامج "صاحبة السعادة" المذاع على قناة DMC: "أنا حابة من بيت الموسيقى التصويرية بتاعة طفولتي، أخويا كان بيعزف تشيلو، وأختي كانت بتعزف كمانجا، وأبويا كمان بيعزف عود وبيغني، وكان مطرب في فرقة موسيقية عربية، فطلعت لقيت البيت كله كده، وكنت بقعد أقلد أختي وأعزف كمانجا، وبعد كده دخلت أنا كمان وبقيت بعزف".
وأضافت أنها منذ صغرها كانت تغني وتعزف، مشيرة إلى أول تجربة تمثيلية خاضتها في سن مبكرة، حيث قالت: "من وأنا عندي ست سنين، كان في شاب في معهد السينما بيعمل مشروع التخرج، فاختارني أمثل معاه في فيلم. مش فاكرة شكلي أوي في الفيلم ده، بس الحاجة الوحيدة اللي فاكرها ومتأكدة منها، هي إني هفضل في المجال ده وهكمل فيه طول حياتي".
وأكدت ألحان المهدي حبها الكبير للتمثيل، موضحة: "أنا حبيت التمثيل جدًا، ودائمًا بحس إن ربنا بيعلمّني حاجات معينة علشان تصب في هذا المجال".