أسامة عرابي: حمادة إمام حاول يضمني للزمالك.. لكني أهلاوي للنخاع!
كشف الكابتن أسامة عرابي، نجم الأهلي السابق، عن تفاصيل مثيرة من بداياته الكروية، مشيرًا إلى أن كابتن حمادة إمام، نجم الزمالك الراحل، كان سببًا في اقترابه من القلعة البيضاء لأول مرة.
وقال عرابي، خلال حديثه في برنامج "بالخط العريض" المذاع على قناة الحياة: "كابتن حمادة إمام الله يرحمه كان بلدياتي، وشافني مرة في دورة رمضانية، وكان بيتفرج على الناس، وأعجبه مستواي جدًا، فقرر ياخدني معاه على نادي الزمالك".
وأضاف: "روحت فعلاً الزمالك، بس مع احترامي الكبير للنادي، أنا كنت أهلاوي جدًا، ووقتها رفضت ألعب هناك".
وأوضح أنه بعد هذا الموقف ابتعد لفترة عن ممارسة الكرة بشكل رسمي، وقال: "رجعت ألعب في الشارع وزعلت طبعًا، خصوصًا إن كل اللي حواليا كانوا شايفين إني لازم ألعب في نادي، وكانوا دايمًا بيشجعوني على ده".
وتابع حديثه عن نقطة التحول في مشواره: "قعدت حوالي 3 سنين مش بلعب، لحد ما ظهر اسم المقاولون العرب بقوة في بداية التمانينات، وكانوا واخدين بطولة إفريقيا وفيهم نجوم كبار، واحد صاحبي قالّي نروح نادي المقاولين، روحت وقعدت هناك 3 سنين".
وأشار إلى أنه بعد فترة مع المقاولون عاد مرة أخرى للحيرة بين الأهلي والزمالك: "الدنيا لفت بيا، وروحت الزمالك تاني وكان عندي 18 سنة، بس برضه ماكملتش، بعدها انضميت للنادي الأهلي في فريق تحت 20 سنة، وهناك بدأت الرحلة الحقيقية مع الجيل العظيم".