ويزو: اسمي مستوحى من اللانشون!
كشفت الفنانة الكوميدية ويزو، عن أصل اسم شهرتها الذي ارتبط بها منذ بداية مشوارها الفني، مؤكدة أنها لا تمانع في استخدام اسمها الحقيقي "دينا محسن"، بل تحبه وتفتخر به.
وقالت ويزو، خلال حديثها في برنامج "واحد من الناس" المذاع على قناة الحياة: "اسم ويزو طلع وأنا في تالتة إعدادي، كان فيه نوع لانشون اسمه كده، وكنت باخده معايا المدرسة كل يوم، وفيه واحد صاحبي فجأة قال للناس في الفصل: يا جماعة دينا محسن اسمها ويزو! ومن وقتها الاسم لازمني".
وأضافت مازحة: "اللانشون ده كان طالع قبل لانشون الشيكي دودو، وكان الإعلان بتاعه منتشر جدًا وقتها، وعلشان كده الاسم انتشر بين زمايلي بسرعة".
وعن حياتها العائلية، أوضحت ويزو: "أنا الأخت المتوسطة، عندي أخت أكبر مني بسنتين اسمها أميرة، وأخويا محمد أصغر مني بخمس سنين، وأنا بصراحة أغرب واحدة في العيلة، وكمان أتخن واحدة بس دمنا خفيف جدًا، من جهة جدتي وعيلة بابا".
وتحدثت ويزو عن طفولتها بشكل طريف، قائلة: "ماما كانت بتقفل علينا الباب، ومكنتش بتخلينا ننزل نلعب في الشارع. كنا يوم ما نخرج، نروح مكتبة سوزان مبارك في المعادي، أو نادي المعادي نتفرج على الناس وهي بتجري، بس إحنا مكنّاش بنعمل حاجة غير كده".