فريد النقراشي: شخصية "صبحي" في "فهد البطل" جذبتني لأنها واقعية ومظلومة
كشف الفنان فريد النقراشي عن كواليس انضمامه لمسلسل "فهد البطل"، مؤكدًا أنه يفضل في الفترة الأخيرة التركيز على التدريب والتدريس أكثر من التمثيل، لكن شخصية “صبحي” جذبته بشدة.
وقال النقراشي في تصريح خاص لـ"وشوشة": "أنا بقالي فترة مش بوافق أشتغل كممثل، بفضل أكتر فكرة التدريب والتدريس، لكن لما أستاذ أحمد العوضي كلمني على الشخصية دي في "فهد البطل" كانت المبادرة منه، وحبيت الشخصية جدًا، لأنها واقعية، وجدع، ومظلوم ومطحون، فكرني بشخصية قدمتها زمان في العار، وأنا أميل للشخصيات المقهورة".
وأضاف: “رقم واحد بالنسبة لي أشوف الشخصية كبني أدم، أتعرف عليه وأفهمه كويس جدًا، أفهم علاقاته والصراعات اللي جواه، وبعد كل ده، أهم حاجة إن الأداء يكون بسيطًا وطبيعيًا، بدون أي تصنع".
وعن أسلوب بعض الممثلين في الأداء، أوضح: “دلوقتي في بعض الممثلين بيعتمدوا على الكلام وخلاص تحت شعار ‘إياك أن تمثل’، لكن ده مش معناه إنك متحسش، دايمًا بقول للي بيتدربوا معايا: لو عشت الشخصية، مش هيفرق تقول أو متقولش، لأن وقت ما تيجي الكاميرا عليك، هتكون حاضر بالشخصية، وده هو الأهم".