أحمد سعد يروج لألبوم "حبيبنا" بفيديو دعائي مميز

أشعل الفنان أحمد سعد حماس جمهوره استعداداً لإطلاق ألبومه الغنائي الجديد "حبيبنا"، الذي من المقرر طرحه على جميع منصات الموسيقى اعتباراً من 15 يناير الجاري.

وشارك أحمد سعد جمهوره بفيديو دعائي مميز عبر منصاته على مواقع التواصل الاجتماعي للترويج لألبومه الجديد.

 الفيديو بدأ بمشاهد ساحرة من منطقة القاهرة التراثية، حيث تحدث سعد عن رحلته لتحقيق أحلامه قائلاً: “حاجة جميلة أوي يكون عندك حلم، والأجمل إنك تحققه طول عمري أحلامي ملهاش سقف وأنا صغير كنت بحب المزيكا جداً، كنت بشوف كل حاجة ألحان، حتى الكلام كنت بشوفه لحن إخواتي كانوا بيستغربوا إزاي طفل يحفظ حاجات تقيلة زي دي كنت أسمع المشايخ وأم كلثوم وعبد الوهاب، وأسأل نفسي: هتغني إيه في ده كنت أسمع كل أنواع الموسيقى، أدور على الشكل اللي الناس تشوفني فيه”.

وتابع: "لكن الحياة صدمتني أول صدمة، واكتشفت إن الطريق مش سهل كنت محتاج الناس تحبني، وفضلت أسعى وأجرب وأعمل أشكال جديدة في المزيكا قضيت 15 سنة أعمل اللي بحبه واللي الناس بتحبه، أراقب زملائي وأتعلم منهم علشان أفهم الجمهور عايز إيه".

واصل أحمد سعد حديثه قائلاً: “وصلت لمرحلة أقدر أعمل اللي الناس بتحبه بطريقتي الخاصة، وحققت النجاح اللي ما جاش في يوم وليلة بقيت أشوف حب الناس في عيونهم، وأسمعهم يغنوا ورايا على المسرح بأعلى صوت اليوم الحلو ده و وسع وسع ، وده كان إحساس لا يوصف، كنت حاسس إني طاير في السما”.

وأضاف: "لكن مع النجاح، بدأت المسئولية لازم أقدم اللي الناس بتحبه وفي نفس الوقت اللي أنا بحبه وأنا مؤمن إن أي حاجة تطلع من القلب هتوصل للناس وهتحبها المرة دي، هقدم حاجة مختلفة، حاجة بحبها بجد، وهطير بيها مع الجمهور الأيام الجاية هتكشف لكم تفاصيل تجربتي الجديدة".